Efterskolertut Aalborgimi naapeqatigiipput
Aalborgimi Kalaallit Illuutaata region Nordjyllandimi efterskolertut katersuutsippai
ippassaq sisamanngornermi Aalborgimi Kalaallit Illuutaata region Nordjyllandimi efterskolit tamaasa kalaallinik atuartullit illumi naapeqatigiinnissamut qaaqquvai.
Nunap immikkoortuani tassani aggustimi kalaallinit atuartunit 59-init aallartittunit ataasiinnaq angerlarsimavoq. Taanna ullormi atuarfissami siullermi angajoqqaanilu atuarfimmut takkussimapput, atuartussarlu oqarsimavoq "tassani atuarusunngilanga", taavalu ilaqutariit angerlaqqipput.
Maanna aallartinnerup kingorna qaammatit marlussuit ingerlareersut sinneri ingerlalluarput, ukiorpassuarnilu misilittakkat takutippaat kalaallit efterskolertut qaammatit siullit marlussuit ingerlatereersimagaangamikkit qularnarpiarneq ajortoq efterskolernerup sinnera aamma ingerlassinnaagaat.
Sisimiuni Oqaasileriffiup ukioq manna Danmarkimi efterskolerniarlutik qinnuteqartorpassuit itigartissimavai. Oqaasileriffiulli qallunaat efterskolianni atuartussatut akuerisai atuarfimmiinnissaminnut atuagarsornikkut piareersarluarsimapput. Tamanna jyllandip avannaani efterskolit uppernarsarpaat.