Oqallisissiaq: Aalisartortavut ataqqinartumik pineqarlit

Aalisartorpassuit ippassaq Inatsisartut ataatsimiittarfiata silaataani Naalakkersuisunut Inatsisartunullu pingaaruteqarluinnartunik oqaasissaqarlutik akerliussutsimik takutitsipput.

Tamat oqartussaaqataanerat inuinnaallu naalakkersueqataanerat pingaaruteqarluinnartoq piginnaatitaaffigisartik atorlugu.

Erloqisumik aammalu ilungersortumik Naalakkersuisunit tusaaneqarnissartik aammalu suleqatigineqarnissartik pingaarnertut kissaatigaat.

Aalisarnermut inatsisissaq Inatsisartuni suliarineqarluni aallartinneqarpoq aalisartunut piniartunullu tusarniutigineqarsimanngitsoq.

Qujaniartarpugut nunami najugaqaratta tamat oqartussaaqataaneranni killeqanngitsumillu oqarsinnaatitaaffeqartumi ataqqineqarluta inuungatta. Kisianni uani Siumumit erseqqissumik oqassaagut, ippassaq Naalakkersuisunit takusarput killormuanik iliortoqarneranik atuutilersitsisoqarsimaneranillu pisoqalersimavoq.

Aalisartut oqalugiarnerminni suaaruteqarnerminnilu pingaartutut taasai tassaapput:

• Aalisartorpassuit tunngavitsik annaassavaat allat aalisarneq aqulissammassuk.

• Aalisarnermut inatsimmi piginnittussaanermut tunngasoq killormut saatinneqarluinnarnissaanik oqarneq, tassalu 50/50 tunngavigalugu ingerlatsineq ingerlaannaqquneqartoq.

• 10%-miit 15%-mut qaffaaniarneq ilaqutariippassuit pisinnaatitaaffiiagaassutigissavaat, suliarlu KNAPK peqatigalugu nutaamik siunnersuusiarineqartariaqartoq.

• Pinngortitaleriffimmik pisassanik annertussusiliisarneq uniuuttumik aallaaveqartoq.

• Pissutsit piviusut aallaavigalugit inatsit suliarineqartariaqartoq tamarmillu oqartussaaqataasut ilusilersueqataatinneqartariaqartut.

Aalisarnermut naalakkersuisoq Naalakkersuisut sinnerlugit oqaaseqarnerani akerliussutsimik takutitsisut tunupput.

Pissusilersorneq oqariartuutilik erseqqissumik!

Aalisarnermu naalakkersuisoq tusaaneqarumanngilaq aamma tunuaqquneqarpoq.

Aalisarnermut naalakkersuisoq tunuaqquneqarpoq. Naalakkersuisut siulittaasuata tusaavaa. Kisianni oqaaseqanngilaq. Oqaatigisat pingaaruteqarluinnartut nunap siuttuatut oqaaseqanngitsuuissornera Siumumit sakkortuumik uparuarparput. Ataqqinninnermik takutitsinngilaq, oqaaseqarfigeqqusut tusaanngilai, oqaasissaqarfiginngilai sulilu oqaasissaqartut qimaannarlugit iserpoq.

Nunap siuttuatut inuiaqatigiit erloqisut tusaagaluarlugit oqaaseqarfiginnginneri ataqqinninnginnermik angisuumik takutitsineq akuersaarneqarsinnaanngilaq.

Nunap inui sinnerlugit naalakkersuisut inatsisartullu sulipput. Allamik naamik. Naalakkersuisut siulittaasuata oqaaseqannginnera pissusilersorneratigut akissutissarsisinnaavugut, tassalu akerliussutsimik takutitsisut tummeqqaniit isigalugit tunuarterluni tamorasaarluni isiginnaaginnarnera soqutiginninnginnermik aammalu sunniuteqarsinnaanngitsutut imminut inissippoq. Inuiaqatigiit saanni.

Periuseq tamanna qimanneqarli. Inuiaqatigiit ataqqillugit, oqaasissai tusaallugit, sullillugit, pisinnaatitaaffii oqaasissaalu ataqqillugit sulisussaavugut – tassa qinikkatut suliassarput nuimanerpaaq.

Siumut Naalakkersuisut inussiarnersumik kaammattorpai KNAPK, aalisartut piniartullu immikkoortortaqarfii aammalu susassaqartut tamarmik peqatigilluinnarlugit torersumik angusassamillu siunnerfeqartumik suleqatigeqqullugit minngurunngitsumillu aalisarnermut inatsisissat tukummatiginagu eqqissillutik suleqatigiittoqarnissaa angutserlugu sulisoqassasoq.

Taamaattoqanngippat inuiaat qulaatiinnarlugit sulineq atuutilersinneqassaaq aammalu nunasiaataasimanerup nalaanitut pissutsit Namminersorup atuutilernerani eqqunneqarsimassapput.

Inuiaqatigiinni inuussutissarsiut pingaarnerpaatillugu aammalu inatsisissaq annertuumik sunniuteqartussaatillugu tamarmik susassaqartunit piginneqataaffigalugu inatsisissap atulersinneqannginnaranik sulisoqarnissaa suliassaavoq pingaarneq.

Siumut aalisarnermut ataatsimiititaliaani ilaasortat sinnerlugit,

Politikkikkut oqaaseqartartoq sinnerlugu,

Aleqa Hammond

Siumup siulittaasua

Akerliussutsimik takutitsineq pillugu Sermitsiap allaaserisaa aamma atuaruk. Aviisi uani pisiariuk.