Nunasiaatitut pissusilersorpugut
Kuupik Kleist nunatsinni inuiaqatigiit qanoq isikkoqartut kissaatigineripput pillugu oqallissaarivoq
Kalaallit Nunaanni inuutissarsiornerup ilarujussuani nunasiaateqarnerup nalaanisut inissisimavugut.
Qangaanerusoq KGH-p GTO-llu suliassat amerlanerit suliarisarpai, naallu namminersornerullutik oqartussani suliffeqarfipiluunersuit taakku marluk aggulunneqaraluartut piginneqatigiiffinnut assigiinngitsunut soorlu Royal Greenland A/S, Royal Arctic Line A/S, KNI A/S, Tele Greenland A/S aamma Great Greenland A/S suli tassa "naalagaaffik" maannakkut namminersorlutik oqartussatut isikkoqarluni nunatsinni inuutissarsiornikkut annertuumik oqartussaavoq.
Naalakkersuisut siulittaasuata Kuupik Kleist sisamanngormat Inatsisartut ataatsimiittarfiani kajumissaarivoq »tunngaviusumik oqallisigissagipput inuiaqatigiit qanoq ittut pilersukkusunnerlutigik, ineriartornermilu naalakkersuinermik suliallit sutigut sunniuteqartassanersut«.
Tamanna pivoq piginneqatigiiffinni/ingerlatseqatigiiffinni tamakkiisumik ilaannakuusumilluunniit namminersorlutik oqartussani pigineqartuni piginnittuunermut ineriartornermullu tunngasut nassuiaatigineqarneranni. Oqallinneq taamaattoq ingerlanneqartuartarpoq, ingammik naalakkersuinermik suliaqartut iluatsinngitsumik inuutissarsiornermut akuliukkaangata, tamakkulu inerneri tassaasarput Qorlortorsuarmi iqalunni tukertitsivik imaluunniit Kinamut puisinik pølsiliorneq. Oqallinneq sakkortusarpoq, taamaattorli tunngaviusumik oqallinneq suli piviusunngorsimanngilaq.
Oqallinnermi sammiviit sumi tamaaniittarput. Ilaannikkut oqartoqartarpoq niuernikkut ingerlatsinermik naalakkersuinermik suliallit akuliutissanngitsut, tamakkumi inuutissarsiornermik suliallit ilisimanerumatigik, ilaannikkut oqartoqartarluni naalakkersuinermik suliallit sinersortaatinik ingerlatsissasut, nunaqarfinni niuertarfinnik, tunitsivinnik, timmisartornermik puisillu amiinik tunisassiornermik.
Pissaaneq annertooq
Nunatut allatuulli tamat oqartussaaqataanerannik ingerlatsisutut Kalaallit Nunaanni inatsisiliorneq qinikkanit suliarineqartarpoq, Kuupik Kleistilli immikkuullarissutut isigaa namminersorlutik qoqartussat suli nunatsinni suliffeqarfiit annerit ilarujussuinik piginnittuummata.
Aamma naalakkersuisut atortitsisutut akisussaaffigaat suliffeqarfinnut akuersissuteqartarneq pisassiisarnerlu, soorlu aamma naalakkersuisut siulersuisuni ilaasortanik toqqaasarlutik, attaveqarnikkut akigititanik aalajangersaasarlutik, aningaasanut inatsit aqqutigalugu tapiissutit aqutigalugit kiffartuussinissamut isumaqatigiissutut namminersorlutik oqartussat namminneq suliffeqarfiutaannut aningaasaliisarlutik.
Ukiualuit matuma siorna nunatsinni naalagaaffiit kisermaassilluni naalakkersorneqartut assigingajappai soorlu Albanien, Cuba aamma Nordkorea. Kingorna Albanien peerpoq, Cubami Fidel Castrop ukiuni 50-ini naalakkersuineranik aniguisussanngorput, kiserngoruppullu kikkunnilluunniit peqatigiumaneqannitsut Nordkorea.
Kuupik Kleist tunngaviusumik oqallionnissamik kajumissaarinermini 2003-mi namminersorneq pillugu isumalioqatigiissitap kalaallinit inuttaqartut isumaliutersuutaat aallaavigaa:
»Kisermaassinerit pissusissamisoortut ingerlatseqatigiiffiillu pisortanit pigineqartut tamakkiisumik ilaannakortumilluunniit tunisassiornermik kiffartuussinernillu ingerlatsivigisaasa attatiinnarneqarnissaat arlalitsigut pisariaqarsinnaasoq Namminersorneq pillugu Isumalioqatigiissitat nassuerutigaat. Kisermaassinerilli taakku attatiinnarneqassappata ingerlatseqatigiiffiit taakku ingerlataasa suliassanut pingaarnerpaanut killilerneqarnissaat isumalioqatigiissitat kissaatigaat. Ingerlatseqatigiiffiit taakku ingerlatseqatigiiffittut tunisassiornermi kiffartuussinermilu ingerlatarpassuarnik namminersortutut unammilleqatigiinnikkut pitsaanerujussuarmik ingerlanneqarsinnaasutut ullumikkut inissisimapput.«.
Oqallinnissaq aallartissinnaalerpoq.