Hinnarik Paamiuni
Aliikkusersuisussaq Hinnarik ukiumoortumik Paamiut Asasarap ingerlanneqarnerani Paamiunut qaaqqusaavoq
Meerarpassuit Hinnariup tikinnissaata tungaanut ullunik kisitsipput, tassalu qilanaarnermik. Nipilersortartut tusaamasat danskit TV2-kkut Hinnariup tikeqatigai, tusaamasat pinnagit meerarpassuit Hinnarik kisiat ussappaat, taama Kommuneqarfik Sermersooq tusagassiutinut nalunaaruteqarpoq.
Paamiut Asasara innuttaasunut sapaammi oktobarip 9-ni assigiinngitsunik aaqqissuussivoq, tassanilu Hinnarik meerarpassuarnik malitseqarluni akuulluarpoq.
Arpattoqarpoq, billiardertoqarpoq, nallukattartoqarpoq, cykkilinik sukkaniuttoqarpoq, qilanaarineqarluartorlu arsaattarfeeraq nutaanik ungalulersorneqarsimasoq atoqqaarfissiorneqarpoq. Meeqqat inersimasullu ullup ilarujussua arsaannermik unammiuaarput, silalumi atoruminarmat. Aaqqissuussinerni assigiingitsuni meeqqat diplominnammata Hinnarik agguaasseqataavoq.