Imaani angalasut attaveqatigiittarnerat pitsaanerusinnaavoq

Danskit pisortaqarfii akisussaasut sipaarniuteqarmata Kalaallit Nunaanni imaatigut attaveqaat pisariaqariaqartinneqartoq aaqqinnianngilaa, Manasse Berthelsen naliliivoq

Manasse Berthelsen: - Imaani pitsaanermik attaveqaateqartariaqarpugut.

Nunat Avannarliit ukioq manna Nuummi ataatsimiinnerminni isumaqatigiissutigaat, nunat arfineq-marluk issittumiittut SAR'imik taallugu isumaqatigiissut, Issittumi ujaasinernut annaassiniarnernullu tunngassuteqartoq, ikioqatigiinneq eqqartorneqarpoq aammali suliassaqarfimmi nammineq akisussaasuuneq ilisimaneqasasoq. SAR pissusissamisut ingerlassappat pisariaqassaaq, attaveqatigiinnermut atortut pitsassuit inerisarneqareersimasut atorneqartariaqartut.

Tassuuna Kalaallit Nunaat katataaqqavoq, nalagaaffik sipaarmat aammalu kalaallit folketingimut ilaasortaatitaat eqeersimaanngimmata.

Maannakkorpiaq taama inissisimavugut, umiarsuarnik ajornartorsiorsinnaasunik ujaasisoqarnera pissutigalugu nukippassuarnik atuivugut - sapaatiummat umiarsuit radioatigut mayday kalerriutigineqarnerata kingorna. Attaveqaatit pitsaanerit pigineqarsimagaluarpata, paasereersimassagaluarparput kalerriut suminngaanniit nassiunneqarsimanersoq, soorlu aamma paasereersimassagaluaripput "nukappiarapalaat" naalanngisaarutaat imaluunniit ilumut umiarsuup Upernaviup kujataani kivilersup kalerrisaarinera tusaaneqarsimanersoq.

- Kalaallit Nunaat/Danmark nunat tamalaat akornanni imaatigut aaqqissuussinerat GMDSS system sinerissani radionut ilanngutsinngippassuk, imarsiortut attaveqatigiissinnaanerisa pitsaanerulernissaat suli ungaseqaaq. Taama naliliivoq Manasse Berthelsen, Tuneq Communication'imi pisortaq, aammalu GMDSS atuisinnaalerlutik allagartartaartartunik pikkorissaasartoq.

- Danmark aamma nunarpassuit allat GMDSS atugaraat - taassuma teknologia atorlugu kalerrisaarisut sumiissusersiuaannarneqarsinnaapput, Manasse Berthelsen ilisimatitsivoq.

- VHF-radio tamarmikk ullumikkut DSC (Digital Selectiv Call) atortoraat, toortagannguaq ataaseq toorlugu paasissutissat nassiukkusutat nassiunnissaat periarfissaavoq. Toortagaq Distress atorlugu.

"Distress"-ilisimatitsissut nassiunneqartillugu makku paasissutissat ilanngunneqartarput: Ajunaalernermi kalerriut, MMSI nr. (umiarsuup sunaanera), sumiiffik eqqortoq (radio GPS'imut ikkusimasoq) kiisalu nassiussinerup piffissaa. Aamma periarfissaqarpoq ajornartorsiorneq sorliunersoq piffissaqaraani toorsinnaallugu.

Paasissutissat tamakku Kalaallit Nunaanni sinerissami radiot pissarsiarissallugit periarfissaqanngillat, Manasse Berthelsen ilisimatitsivoq.

- Umiarsuit aamma umiatsiat allat tamarmik DSC'mik atortulersugaapput, ajunaalernermik kalerrisaarutinik tigooraasinnaasut, Manasse tikkuaavoq.

- Danmarkip imarsiornermi pisussaaffiit akisussaaffigai, imaatini upalungaarsimanermi attaveqaatit ineriartortinneqannginneri ajorluinnarpoq, Manasse Berthelsen naliliivoq tikkuarlugulu, akiliisussaqarunanngimmat Kalaallit Nunaanni atorneqartartut tigooraassutit nassiussutillu DSC'mik atortoqarnissaannut, imaluunniit kalaallit Nunaanni imaatigut angalasut tamarmik taamaattunik atortoqarnissaat piumasaqaateqartoqarumanngimmat.

- Aalajangiinissamut akisussaaffik naalagaaffiup Namminersorlutik oqartussallu akornanni timmeralaarpoq, Manasse Berthelsen oqarpoq.

Tamakkua saniatigut oqarpoq kukkunerujussuusoq MF/HF nassitsissutit qaminneqarsimaneri, taakkumi imaatigut upalungaarsimanissaq pillugu pingaarutilinnik nalunaarutiginnittarmata. Ammassalik Radio atorunnaarsinneqassaaq Aasiaat Radioanit sullinneqalerluni. Qaanaaq aamma Illoqqortoormiuni aalisartut piniartullu sinerissami radioqarfinnik toqqaannartumik attavineqarsinnaanngisaat, Manasse tikkuaavoq.

Manasse Berthelsenip aamma uparuarpaa, sunngiffimmi piniartartut aamma umiatsiaararsorlutik aalisartut piniartullu VHF'imik radioaqarnissaat inatsisitigut piumasaqaataanngimmat. Politiinit Kangilinnguanilu sakkutooqarfiup innersuussutaat kisimik piupput tassa taamaattoqartariaqaraluartut, pingaartillugulu tikkuarlu, kissaatiginartoq politikkerit paasissagaat imaatigut isumannaallisaanermi attaveqaatit ineriartortinnissaat qanoq pingaaruteqartut.

- Piffissaq aningaasarpassuillu sipaarneqarsinnaapput imaatigut isumannaallisaanermi attaveqaatit naleqquttut atorneqalerpata, Manasse Berthelsen oqarpoq.

GMDSS paasisaqarfiginerorusukkukku

http://tuneq.nuna.gl/index.php?id=119

http://en.wikipedia.org/wiki/Global_Maritime_Distress_Safety_System

www.gmdss.org

Powered by Labrador CMS