Imaani isumannaallisaanermik pikkorissarneq
Kujataani imaani isumannaallisaaneq pillugu pikkorissartut kilisaatini suliffittaarsinnaapput
”Ilinniarneq suliffissaqalersitsisarpoq”, Kommune Kujallermi Inuussutissarsiornermut Suliffeqarnermullu Ataatsimiititaliap siulittaasua Kalistat Lund taama oqarpoq, kommunip aalisakkanik tunisassiorfimmik APP-imik kiisalu Paamiuni Imarsiornermik Ilinniarfimmik suleqateqarluni imaani isumannaallisaanermut pikkorissaaqqinnerata kingorna.
Upernaaq pikkorissarneq tassunga assingusoq 17-inik peqataaffigineqarluni ingerlanneqarpoq, peqataasullu ilaat 15-it kingorna suliffeqarfiup kilisaataataani sulilerput. Tamatumuuna 14-it pikkorissaqataapput imaani isumannaallisaanermut allagartartaarlutik.
- ”Suliffeqarfiup tamaani najugaqartuni inuttaqarumasarnera Kommunimiit iluarisimaartorujussuuarput. Aammalu tamaani najugallit suli inuttassarsiarineqartassappata, taava sulisut inatsisitigut piumasarineqartutut pikkorissarsimasariaqarput.” ataatsimiititaliap siulittaasua Kalistat Lund oqarpoq.
Pikkorissarneq aamma suliffeqarfimmit APP-mit iluarisimaarneqarpoq. Pisortaq Markus Jacobsen oqarpoq: ”Kommune ilinniarfiillu suleqatigalugit pikkorissarnerit taakku marluk najukkami ingerlassinnaasimagatsigit iluarisimaartorujussuuarput. Sulisut Nanortalimmiit, Alluitsup Paaniit aammalu Narsamiit pikkorissarumallugit ungasiliartariaqanngimmata aningaasat ilinniarnermut atorluarneqarnerujussuupput. Pikkorissareersimasullu suliffeqalernissaminnut periarfissaqarlualissaqaat.”
Kommune Kujalliup aammalu suliffeqarfiup APP-ip maannangaaq oqaatigereerpaat 2012-imi pikkorissarnissamut suli periarfisseeqqissallutik.
Pikkorissarnerit piginnaanngorsaanermut aningaasaliissutaasartut atorlugit Namminersorlutik Oqartussaniit aningaasalersugaapput suliffeqarfillu ininik pikkorissarfissanik annaassiniarnermilu atortunik atugassaqartitsisimalluni.