Meeqqanut inuusuttunullu akeqanngitsumik filmertitsinerit

Akeqanngitsumik filmeriarsinnaassaatit pingasut 16-illu akornanni ukioqaruit Nuummi, Sisimiuni imaluunnit Ilulissani najugaqarlutit.

Ukiut pingajussaat Buster Filmfestivalip kuffertiminik poortuissaaq meeqqanut inuusuttunullu filmiliat pitsaanerpaat nassarlugit avannamut ingerlassagami.

Tamatumuuna festivalip Nuuk, Sisimiut aamma Ilulissat aqqusaassavai kikkulluunniit 3-16 ukiullit Busterip filmiutaasa silarsuaannut qaaqqullugit.

Taama pilersaarusiorneq Napamit - Nunani avannarlerni piorsarsimassutsikkut suliaqarfik, Det Kongelige Grønlandsfond aamma Kulturfonden Danmark-Grønland tapersersorneqarpoq. Buster tusagassiivinnut nalunaarummi allappoq.

Illoqarfinni 3-ni Festivalfilm

Buster tassaavoq Københavns Internationale Filmfestival for Børn og Unge, Københavnip nunat tamalaat akornani meeqqanut inuusuttunullu Filmfestivalia, septembarimi ingerlanneqarmat atuartorpassuarnit ilaqutariinnillu meerartalinnit danskit filmertarfiinut ornigarneqarluartumik ingerlatsisoq. Maannakkut kalaallit meerartaat inuusuttortaallu Busterip filmiuterpassuini takusinnaassapput, filmit filmertarfinni nalinginnaasuni anngunneq ajortut ilaat.

2009-mili festivalimit aaqqissuussat angallanneqarsinnaasut Busterip Nuuliaattarpai, ukioq mannali kalaallit meerartaasa inuusuttortaasalu filmit tupinnaannartut isiginnaarsinnaasavaat, Buster akeqanngitsumik Sisimiuni Ilulissanilu filmertitsilerpat.

Nuummi Kulturikkut illorsuarmi Katuami oktobarip 31-aniit novembarip pingajuat ilanngullugu takutitsisoqassaaq.

Filmit Sisimiuni kulturikkut illumi Taseralimmi novembarip aappaaniit sisamaat ilanngullugu kiisalu Ilulissani kulturikkut illumi Sermermiuni novembarip arfineq-aappaanit qulingiluaat ilanngullugu.

Filmit toqqakkat meeqqanut meeraaqqerivinniittuniit atuarfinni klassini tamaginni atuartunut naleqqupput.

Nunat avannarlernit filmit naatsuliat, hollandimit quianartut aammalu svenskit filmiliaat nersornaasigaq

Atuartunut minnernut hollandimiut meeqqanut filmiliaat quianartoq 'Familien Tyksen' takutinneqassaaq, ilaqutariit pualasuut illoqarfimmut allanut nuuffianni inuit tamarmik timigissartarput nerisassallu orsoqarpallaat assut akeralugit.

Atuartunut akullernut filmit sisamat nunani avannarlerneersut - tassannga danskit filmiliaat pingasut 13', 'Den første Anders' aamma 'Nemesis' kiisalu 'Jeg er rund' svenskit filmiliaat, kiisalu angajullernut Anders Grönros'ip inuusuttuaqqanut filmiliaa nersornaasigaq 'Jag saknar dig' takutinneqassallutik.

'Jeg er rund' ukioq manna Buster Festivali ingerlanneqarmat filminik naatsunik piviusorsiortunillu naliliisartut immikkut taavaat, taannalu nunat avannarliit filmiliaat naatsut takutinneqalerpata ilaassaaq.

'Jag saknar dig' ukioq manna BUSTER-prisenimik tunineqarpoq Inuusuttunut filmiliat pitsaanersaatut nersorneqarluni, sammisamik imaannaanngitsumik imaqarpoq qaniginerpaasatsinnik annaasaqaraangatta qanoq ingerlariaqqinnissaq qunusuitsumik eqqartoramiuk.

Sisimiuni Ilulissanilu filmit tamarmik kalaallisut oqaasertaqarput Nuummili neqeroorutigineqassaaq filmit kalaallisut imaluunniit danskisut oqaluttut isiginnaarnissaannut.

Meeqqerivinniittartut isiginnaagassaat

Meeqqanut mikinernut 2-nit 6-inut ukiulinnut filmit naatsut arfinillit nuannerluinnartut neqeroorutaassapput.

Meeqqat mikinerit Agerndrengen taassumalu igutsaat, uniaaluit uumasuaqqallu allat angalaaqatigissavai.

Aamma svenskit filmiliaat titartakkanik akusaq 'Frikadeller og lastbiler' takutinneqassaaq, filmimi frikadelliaqqat suusupagisariaqanngitsut aamma lastbilip qalipaataa immikkut isumaqartoq erseqqissaatigineqarput.

Filmit naatsut assigiinngitsunik misigisassaqartitsipput, quianartut ilumoorsaartut aammali takorluukkersaarutit meeqqat mikinerit isiginnaagassaraat, filmit ilaat oqaasertaqanngillat allalli kalaallisut oqaasertalersugaapput.

Filmit arfinillit pillugut uani annerusumik paasisaqarsinnaavutit.