Nunaqarfiit ulorianartorsiorput

Pisortat tunisassiorfinnut tapiisarnermik allanngortiterinera nunaqarfinni tunisassiorfinnut ulorianartorsiortitsivoq. Nunaqarfinni sulisut siunissaq pillugu ernumapput, Johanne Heilmann Petersen oqarpoq

Nalunaarusiami qanittumi saqqummiunneqartumi naqissuserneqaraluartoq, Kalaallit Nunaata aningaasaqarneranut nunatsinni nunaqarfinni pisortanik namminersortunillu kiffartuussinissamik isumaqatigiissutit akilersinnaasut, aningaasaqarnermut kulturimullu sunniuteqartorujussuusut, amerlasuut isumaqarput soorlu Johanne Heilmann Petersen, Arctic Green Foodimut pisortaq. Arctic Green Foodip nittartagaani atuarneqarsinnaavoq.

- Nunaqarfinni inuuneq sakkortuvoq inuillu nunaqarfinni najugaqarnissaminnik aalajangiussisimasut taamaaliortarput allatut inoorusunnginnamik. Illoqarfinnut nuussinnaallutik nalunngilaat kissaatiginaguli. Pisortat tapiissutaat nungunnagit imaluunniit allanngortiternagit, soorlu suleqatigiinnissamik isumaqatigiissusiornernut, Namminersorlutik Oqartussat piniartut inooriaasissatut toqqaannik ataqqinnittariaqarput nuaannaarutigalugulu kalaallit ukiuni tusindilikkaani kulturerisaminnik ingerlatsiuarnerat. Nunaqarfinni inuuneq kulturimik attassiinnarneq kisimi pingaaruteqanngilaq, piniartulli inuussutissarsiornissaminnut periarfissaqarfigaat suliassaq nuannarisartik aallullugu naak imaannaanngitsunik atugassaqartaraluarlutik, Johanne Heilmann Petersen isumaqarpoq.

Nunaqarfinni aningaasaqarnikkut pissutsit assigiinngeqaat

- Nunaqarfinni tunisassiorfinnut tunisinerup tunisassiornerullu allanngortitilinnginnerini, misissorluaqqaartariaqarparput suut nunaqarfinni ataasiakkaani piorsaaffigineqartariaqarnersut, PhD. Keld Jensen isumaqarpoq, taanna qanittumi nalunaarusiamik saqqummiussaqarpoq pisortat-namminersortullu suleqatigiinnerat nunatsinni nunaqarfinni ineriartornermut sunniutai pillugit.

- Nunaqarfimmiut illoqarfimmiullu inissat pillugit oqaluuserinninnerat toqqissisimannginnermik pilersitsiinnarpoq. Nunaqarfiit ilaat illoqarfiit ilaannilluunniit inuussutissarsiornissamut periarfissaginnerupput, illoqarfiillu ilaasa ineriartornerat pisortanik sullissinermit pissuteqarpoq. Kommune Kujallermi assersuutigalugu, nunaqarfinnit aqqanilinnit arfineq-pingasuni kommunimit aningaasaliussat pisartagassanit annikinnerit pineqartarput, naak inuit amerlassusaat aallaavigalugu pisassat amerlanerusussaagaluit. Illuatungaani Narsaq aamma Nanortalik innuttaasut amerlassusaat naapertorlugu, annikinnermik angaasaliiffigineqartartussaagaluartut. innaatitsissuteqartussaagatik, Keld Jensen nassuiaavoq.

Pisortat namminersortullu nunaqarfinni tunisat aamma tunisassiornermi suleqatigiinnerisa siunertaraat, ukiuni tulliuttuni nammineq akilersinnaasumik suliffeqarfimmik pilersitsinissaq. Nunaqarfinni kiffartuussinissamik isumaqatigiissusiorfilinni aningaasaqarneq suliassaqartitsitillugu ajortigilernerulernavianngilaq. Nunaqarfinni tunisassiorfiit tassaasariaqarput inuussutissanik nammineq pilersornissamut Naalakkersuisut ineriartortitaasa tunngavii, Keld Jensen isumaqarpoq.

Kiffartuussinissamik isumaqatigiissut ajoqqutissaniit pitsaaquteqarneruvoq

- Kujataani suliffissaaleqineq ilaatigut annertoqaaq. Pingaartumik kommunini pisortat-namminersortullu suleqatigiinnissamik isumaqatigiissusiorfigisaanni, Johanne Heilmann Petersen isumaqarpoq nangillunilu:

- Nunaqarfinni suleqatigiinnissamik isumaqatigiissusiorfiunngitsuni ilaatigut qeritsitsivimmut akissaqarneq ajorput, taamaasillutik piniartut pisaminnik tunisiffissaqanngillat naak eqqaminni pisassarpassuaqaraluartoq soorlu puisinik, qaleralinnik nipisaalluunniit suaannik. Tamakku pitsaanermik atugassaqartinneqassapput pisortat-namminersortut suleqatigiinnissamik isumaqatigiissusiornissat aaqqissuunneqarpata.

- Pisortat-namminersortut nunaqarfinni tunisassiorfinnut suleqatigiinnissamik isumaqatigiissutaata pitsaaqqutigaa, qerititsivinnik pisinissamut periarfissagissineq aammalu ilinniarsimasunik atorfinitsitsisinnaaneq, soorlu qerititsivilerisunik aammalu sulisunik ilinniarsimasunik teknikkikkut ajornartorsiutaasinnaasunik aaqqiisinnaasut ilaatigut ajornartaraluartunik. Nunaqarfinni tunisassiorfiit ajornartorsiutaasa annersaraat suliassanut piukkunnarsarsimasunik amigaateqarneq aammalu tunisassiorfiit avinngarusimasuni tikikkuminaatsunilu inissisimanerat, pisortaq Johanne Heilmann Petersen nassuiaavoq.

Sulisut siunissaq ernumagaat

Arctic Green Foodip tunisassiorfii avannaata kommuniani nunaqarfiit uummatigaat sulisullu tunisassiorfiit matuneqarsinnaaneri ernummatigaat. Suleqatigiinnissamik isumaqatigiissuteqanngikkaani imaluunniit isumaqatigiissut pitsaannginnerulissappat tunisassiorfiit matusariaqassapput, suliffissaaleqisullu suliffissarseqqinnissaat ajornakusuussaaq, tunisassiorfinni sulisut amerlanerpaartaat ilinniagaqarsimanngillat, Ikamiuni nunaqarfiup tunitsiviani pisortanngorlaaq, Arnaarannguaq Johansen oqarpoq.

- Pisortat-namminersortut nunaqarfinni tunisassiorfinnut suleqatigiinnissamik isumaqatigiissuteqartinnani Ikamiuni piniartut tunitsivissaqassanngillat. Aalisartut Qasigiannguanut pisaminnik tunisiartortassapput, tamannalu akikitsuinnaanngilaq, Arnaarannguaq Johansen isumaqarpoq.

- Sulisut arlallit siunissamut ernumapput uagummi illoqarfimmi sussaagut, maaniikkusunneruvugut nunaqarfimmi suliffipput paaralugu. Maannakkutut itsillugu amerlanerussuteqartugut akiligassagut akilertarpagut, nerisassarsilluta atisartaarluta tunisassiorfimmi sulinitsinnit akissarsiatsinnik, kommunimut ikiuutinik aallerata. Uanga ilaqutakkalu maani Ikamiuni pilluarluta inuuvugut. Neriuppunga nunaqarfimmi tunisassiorfik ukiorpassuarni suli atassasoq, Kalaallit Nunaannut kalaallinull iluaqqutaalluni, Arnaarannguaq Johansen oqarpoq.

Nalunaarusiaq pillugu paasissutissat

Nalunaarusiaq Ph.D. Keld Jensenimit suliarineqarpoq Arctic Green Food A/S suliakkiutigisaani sammineqarpoq, piniakkap pisarineraniit nunaqarfimmut tunitsivimmi tunisassiarineqarluni nunap iluani tunisassiarineqarneranut aqqutaa aamma nunanut allanut tunisassiat ingerlarngat.

Nalunaarusiaq naapertorlugu inoqutigiit 410-t sineriak tamakkerlugu isertitanit taakkunannga aallaavillit napassutigaat. Inoqutigiit 1.389-inik inuttaqarput, taakkunannga meeqqat 376 15-it inorlugit ukiullit Arctic Green Food A/S aqqutigalugu isertitanit iluaqquteqartut, taannami aqqutigalugu angerlarsimaffiit ataasiakkaat ineqarnermut inuussutissanullu pilersoramik.

2008'mi nuna tamakkerlugu inoqutigiit 410't Arctic Green Food A/S'imut tunisinermikkut suliffeqarnermikkulluunniit isertitaqarput. Ukioq naallugu atorfiit 145 naleqatigalugit, tunisassiornerlu katilluni 10,4 mio. koruuninik naleqarpoq, akissarsiat 10,6 mio. koruuninik naleqarlutik.

Arctic Green Food A/S, Kalaallit Nunaanni inoqarfinni assigiinngitsuni qulini tunisassiorfeqarpoq. Suliffeqarfik nunap pissarititaanik pisanik pisineq, tuniniaaqqiinnermilu qitiuvoq, nunap sinneranut nunanullu allanut tuniniaanermik ingerlatalik.

Aamma takuuk Arctic Green Foodip nittartagaa: www.arcticfood.gl

Powered by Labrador CMS