Faxe Cup ukiuni 20-ni

GSS håndbold ukioq manna ukiut arnat arsarlutik unammiuaarnerat ukiunik 20'nngortorsiortoq Faxe Kondi Cup 2011 aaqqissuutissavaa, ukiuni tamaginni arnat assammik arsartartut pitsaanerpaat nunatsinnit kajumillutik peqataaffigisartagaat.

Ukioq manna sineriammit holdinik peqataajartortoqassanngimmat pakatsinarsinnaavoq. Unammiuaarnerit ukiuni 20'ni oqaluttuarisaanerani aatsaat perngaamik sineriammit peqataasoqassanngilaq.

Tamatumunnga pissutaavoq sumi tamaani aningaasameerneq. Unammiuaarneq naallugu timersortartut angerlarsimaffik qimallugu peqataassinnaanngillat. Suliffeqarfiit ikinnerit akissarsianik annaasaqanngikkaluarluni tamakkununnga peqataanissanut akuersisarput, tamatuma nassatarisaanik timersortartut namminneq akilikkaminnik feriatilluunniit atorlugit ilaasarput, tamakkuli ilaqutariittut inuunermut naleqqutinngillat.

Qaasuitsup Kommunia assammik arsartartut Ilulissaneersut pitsassuit peqataanissaannut tapiiniarsimanngilaq. Unammiuaarnermi I-69 imaluunniit Nagdlunguak ajugaanissaannut periarfissaqarluaraluartut. SAK Sisimiut peqataanissamut aningaasanik katersipput, arsartartulli taama sivisutigisumik angerlarsimaffitsik qimallugit angalasinnaannginnamik, piffissaq kingulleq atorlugu peqataasinnaajunnaarnertik nalunaarutigalugu.

Maniitsumik ukioq manna arnat peqataanissaaminnut naleqqutinngitsut nalunaarutigineqarpoq. Qaqortumit soqutiginnittoqanngilaq. Illoqarfiit anginerit holdiisa ilaat eqqaaginnarpagut. Allaqarpoq peqataarusukkaluartunik angalanissamulli akisuumut akissaqanngitsunik.

GSS ilisimatitsivoq FH Island, NÛK aamma GSS kiisalu Nuummi illoqarfiup holdi unammiuaarnerni peqataasussatuaasut.

Illoqarfiup holdii immikkuullarilaarput. Taakkua nunanit allanit unammisartunit ilaqassapput, Danmarkimit, Ilulissanit, Sisimiunit aammalu Nuummit klubbini marlunneersunit immikkut toqqagaasimanngitsunik inuttaqassallutik. Taamaattumik Faxe Cup ukiunik 20'nik nalliuttorsiorluni unammiuaartitsineranut sinerissamit takkuttoqassaaq.

- Holdi taanna malinnaaffigissallugu pissanganarpoq, Rita Egede, GSS Håndbold'imi aningaaserisoq oqarpoq.

- Jakob Andreasen, nunatta unammisartuisa arnat sungiusaasoriligaat, illoqarfiup holdiani paarlaatsitsinermik ingerlatsissaaq, GSS tusagassiivinnut nalunaarpoq. Jakob Andreassen taamaasilluni arnat piginnaasaanik naliliisinnaassaaq.

- Faxe Cup 1991'mi aallartinneqarpoq ukiut tamaasa Kalaallit Nunaanni arnat assammik arsartarnerat siuarsarniarlugu anguniagaqarluni, GSS'ip siulittaasua Kristian Heilmann ilisimatitsivoq.

Kalaallit Nunaanni Assammik Arsartartut Kattuffiat, kingorna arnat siuarsaavigineqarnissaat tapersersulerpaa, tamanna arnat nunat tamalaat unammiuaarneranni unamminerannilu peqataasalernerannik kinguneqarpoq.

Faxe (Royal Unibrew A/S) unammiuaarnermut pingaarnertut aningaasaliivoq, Ittu.net aningaasaleeqataalluni aamma Sermitsiak.AG unammiuaarnermik tapersersuisuuvoq.

- Ukiut 20't ingerlaneranni suliffeqarfippassuit aaqqissuussisarneq tapersertarpaat, Kalaallit Nunaanni arnat assammik arsartarnerannut pitsaasumik ineriartortitseqataasoq, Kristian Heilmann oqarpoq.

Unamminerit KNR-TV'mi isiginnaarneqarsinnaassapput, aallakaatitassanut taakkununnga Faxe, Tele Greenland A/S aamma BankNordik aningaasaliipput.

- Tamatuma saniatigut Sermersooq Kommunea aamma Ghb-hali suleqatigilluarpagut, Kristian Heilmann oqarpoq, taanna GSS'imut siulittaasuuvoq, aaqqissuisartuulluni aammalu suliniuteqartup, ukiuni 20'ni Faxe Cup'imik tapersersuisut sutigut tamaana peqataasarsimasut qutsavigalugit. der som GSS-formand og

Faxe Kondi Cup 2011 pingasunngorneq okt. 19'at nal.19:00 Inussivimmi aallartissaaq.