Aningaasartakippallaarpoq

Nuna tamakkerlugu kommunit kattuffiata siulitittaasua, namminersorlutik oqartussanik uparuaavoq, kommunit suliassaqarfinnik tigusinissaa arriipallaamik ingerlaneranut pisuutillugit.

Tusagassiivinnut nalunaarummi Martha Abelsen oqarpoq, tigooraaniarneq kigaannerpaaffissaanut inissinneqarsimavoq apeqqutigineqaraluartut akineqarneq ajormata, Namminersorlutillu Oqartussat kiisami iliuuseqaraangamik suliassaqarfiit amigartunik aningaasartalerlugit tunniunniartarmatigit. Isumaqatigiinniarnerit sivisunaaleraraat naalakkersuisoqarfiit pineqartut ikippallaanik aningaasaliinialeraangata. Suliarlu sukkatsinneq ajorpoq Namminersorlutik Oqartussat politikeriisa atorfilittaasalu kommunit isertitaasa Namminersorlutik Oqartussat isertitaannit pitsaanerusumik ineriartorsimanerannik apeqqut assut eqqarsaatigeqqajaasarmassuk, Martha Abelsen tikkuaavoq.

Namminersorlutik oqartussanik uparuaaneq sisamanngornermi Inatsisartuni naalakkersuisut "Kommunit pillugit nassuiaataata” saqqummiunneqarnerata maanna Kanukokap siulittaasuanik Martha Abelsenimik erseqqissaatinik pisariaqartunik ilaaatigut kommunit suliassaqarfinnik namminersorlutik oqartussanit tigusinissaannut kajumissuseqarnerinut tunngasunik, aammali manna tikillugu tigusiniarluni sulinermut akornutaasartunik.

Inuit Ataqatigiit inatsisartunut ilaasortaatitaa Isak Hammon, oqaaseqartutut ujartugaasa ilagaat kommunit namminersorlutik oqartussanit suliassaqarfinnik tigusiniarnerminni piumassuseqarnerusariaqartut.

Kommunit kattunnissaat pisortallu suliassaqarfiisa aaqqissuussaanerannik iluarsaaqqinnissaq ataatsimut isigalugu sulissutigineqalermat kommunit peqataarusunnerminnut tunngavigisaasa ilagilluinnarsimavaat suliassaqarfinnik qitiusumik oqartussanit kommuninut nussuinissaq. Kommuninullu pingaaruteqarpoq suliassaqarfiit isumaginninnermut tunngasuinnaanngitsut aammali inuussutissarsiornermut sanaartornermullu tungasut tigunissaat. Martha Abelsenip erseqqissarlugu kommunit suliassaqarfinnik Namminersorlutik Oqartussanit tigusinissaminnut piumassuseqarluinnarmata.

- Kisiannili suliassaqarfinnik tigooraaneq ullumikkornit sukkanerusumik ingerlanneqassappat Namminersorlutik Oqartussat taamatuttaaq politikkikkut allaffissornikkullu piumassuseqarluinnartariaqarput, siulittaasoq isumaqarpoq.

- Tigooraaniarneq kigaannerpaaffissaanut inissinneqarsimavoq apeqqutigineqaraluartut akineqarneq ajormata, Namminersorlutillu Oqartussat kiisami iliuuseqaraangamik suliassaqarfiit amigartunik aningaasartalerlugit tunniunniartarmatigit.

-Isumaqatigiinniarnerit sivisunaaleraraat naalakkersuisoqarfiit pineqartut ikippallaanik aningaasaliinialeraangata, Martha Abelsen naqissusiivoq.

- Suliarlu sukkatsinneq ajorpoq Namminersorlutik Oqartussat politikeriisa atorfilittaasalu kommunit isertitaasa Namminersorlutik Oqartussat isertitaannit pitsaanerusumik ineriartorsimanerannik apeqqut assut eqqarsaatigeqqajaasarmassuk. Apeqqullu tamanna suliassanut pineqartunut immikkut pingaaruteqanngikkaluarpoq nalunngikkaanni kommunit aningaasartuutissaat amerliartuinnarsimasut, Martha Abelsen oqarpoq ilanngullugu, oqallinnermi kommunit pisortat suliassaqarfiisa aaqqissuussaanerannik iluarsaaqqinnermi peqataarusussuseqarnerat apeqquserneqartalissappat pissutsit piviusut tamakku saqqummiunneqartariaqarput.