MF'ikkormiup CIA pillugu apeqqummi Søvndal akeqquaa

CIA'p timmisartuussisarneri pillugit misissuisoqarnissaanik apeqqutip ingerlaqqinnissaa unitsinniarneqartoq Kalaallit Nunaannit nuannarineqanngitsoq maanna nunanut allanut ministerip akissuteqarfigisussanngorpaa

Folketingemi Inatsiartunilu CIA'p timmisartuussisarsimaneri pillugit Siumut apeqquteqaateqarpoq. . Assi: POLFOTO-AP

Udenrigsminister Villy Søvndal (SF), maanna pinngitsaalineqarluni nassuiaasussanngorpoq, sooq Kalaallit Nunaat qulaallugu inatsisit unioqqutillugit timmisartuussisoqartarsimanernik pasitsaassimaarneq misissuiffiginiarunnaaraa.

Amerikkamiut paasiniaanermik suliallit CIA tigusanik assartuillutik Kalaallit Nunaat qulaallugu timmisartuussisarsimaneragaapput. Kalaallit Nunaanni partiit tamarmik misissuisoqarnissaanik kissaateqarput.

Tallimanngornermi Doris Jakobsen udenrigsministerimut apeqquteqaateqarpoq, misissuisimannginneq pillugu.

Septembarip qaammataani SF partiit misissuisoqarnissamik piumasaqartut ilagaat. Maanna udenrigsministerinngortoq Søvndal oqarpoq misissuinissaq akisuallaartoq.

"Ministerip ilisimatitsissutigiumavaa,CIA'p inatsisit unioqqutillugit Kalaallit Nunaat qulaallugu timmisartuussisarsimanerisa kikkunnut tamanut attuumassuteqanngitsunit misissuiffigineqarnissaanut,aningaasartuutaasinnaasut pillugit qanoq naatsorsuisimanerluni,tamakkalu qanoq akeqarumaarnersut".

Taama Doris Jakobsenip apeqqutaa nipeqarpoq. Taanna isumaqarpoq SF'ip siulittaasua Villy Søvndal neriorsuumminik eqquutitsinngitsoq.

Doris Jakobsen, naalakkersuisut siulittaasuat Kuupik Kleist (IA), attaveqarfigaa danskit naalakkersuisui kimigiiserfigeqqullugit kajumissaarlugu.

Kleistip siusinnerusukkut naalakkersuisuujunnaartut piumasaqaammik saqqummiussiffigereerpai. Taassuma siornatigut danskit marloqiusamik pissusilersornersut annilaanngatigalugu oqaatigereernikuuaa, Wikileaksikkut saqqummiussat aallaavigalugit.

Amerikamiut Danmarkimi ambassadørerisimasaat James Cain, USA'mut allappoq, pisoq pillugu paasiniaasoqalerpat danskit naalakkersuisui tamanut nalunaaruteqalerpata, annilaanngatissaqanngitsut.

Danmarkimi atorfilittat taama ilisimatissimagaani allappoq.

Nuummi Siumut CIA'p timmisartuussisarneri pillugit misissuisoqarnissaanik naalakkersuisunut apeqqutilleeqataapput.

Danskit udenrigsministeritaavata oqaaseqaatai nutaanik imallit pillugit, Siumup siulittaasua Aleqa Hammondip apeqquteqaatigaa, CIA'p inatsisit unioqqutillugit Kalaallit Nunaat qulaallugu timmisartuussisarsimanerisa qulaajarneqarnissaat anguniarlugu naalakkersuisut qanoq iliuuseqarniarnersut.

Aleqa Hammondip apeqquteqaanni tunngavilersorpaa, naalakkersuisut siornatigut oqaatigereermassuk, danskit nutaamik naalakkersuisunngortitassaat utaqqimaaqqaarlugit misissuisitsinissamik piumasaqaateqarumaarlutik, CIA'p nunarput qulaallugu timmisartuussisarsimaneragaanera qulaajarneqaqqullugu.

- Udenrigsministerinngortoq maanna oqarpoq Kalaallit Nunaata kissaataanik pingaartitsinngitsumik nipilimmik, Siumup siulittaasua tikkuaavoq naalakkersuisullu qanoq iliuuseqarnissaannut pilersaarummik ujartuilluni.

Powered by Labrador CMS