CA-p timmisartuussisarnerisa qulaajarneqarnissaa Siumup suli piumasaraa

CIA-p nunatta silaannartaani unioqqutitsilluni timmisartuussisarsimanerata attuumassuteqanngitsunit misissuiffigineqarnissaata taamaatiinnarneqarneranik nunanut allanut ministerip nalunaaruteqarnera akuerineqarsinnaanngilaq. Taamatut isumaqarpoq Siumut sinnerlugu Folketingimut ilaasortaq Doris Jakobsen, misissuinerullu taamaattup "akisuvallaarneranik« ministerip oqarnera maanna erseqqinnerusumik akissuteqarfigeqqullugu.

Taamaasilluni Siumut, qallunaat Socialdemokratit parteeqataat, sinnerlugu folketingimut ilaasortaq isumaqarpoq suliassami tamatumani oqaatsit kingulliit oqaatigineqanngitsut.

- Pingaaruteqarpoq Kalaallit Nunaanni uagutsinnut CIA-p timmisartuussisarneranik pisimasup qulaajarneqarnissaa. Tamanna qinersineq sioqqullugu Villy Søvndalip neriorsuutigisimavaa, uagullu Siumumiit Villy Søvndal tamatumunnga akisussaatinniarparput, pingaartumik massakkut Nunanut allanut ministerinngornerani, Doris Jakobsen oqarpoq, apeqqullu Folketingimi Kalaallit Nunaannut Ataatsimiititaliaq aqqutigalugu saqqummiunniarpaa.

Doris Jakobsenip oqaatsini iliuuseqarnertinngoreerpai ullumilu nunanut allanut ministeri Villy Søvndal imatut apeqquteqarfigalugu:

- Ministerip nassuiarusuppaa CIA-p unioqqutitsilluni Kalaallit Nunaat qulaallugu timmisartuussisarnerata attuumassuteqanngitsunit misissuiffigineqarnissaanut aningaasartuutaasinnaasunut qanoq naatsorsuisimanerluni, aningaasallu taakkua qanoq amerlatiginersut, oqarami misissuineq ingerlanneqarsinnaanngitsoq "akisuvallaaqimmat", takuuk 2011-imi oktobarip 7-ianni www.dr.dk-mi allaaserisaq "Kalaallit Nunaata piumasaraa CIA-p timmisartuussisarnerisa misissorneqarnissaat".

Apeqqut saqqummiunneqarpoq Doris Jakobsenip Kalaallit Nunaannut Ataatsimiititaliami siulittaasup tulliatut inissisimanera aqqutigalugu.

Aamma nunatsinni Siumup kimigiiserutiginiarpaa CIA-p timmisartuussisarneranik pisimasup qulaajarneqarnissaa. Taamaattumik Doris jakobsenip, aamma Inatsisartunut ilaasortaasup, maanna Naalakkersuisut naalakkersuisullu siulittaasuat qinnuiginiarpai qallunaat naalakkersuisunut saaffiginneqqullugit piumasaralugulu attuumassuteqanngitsunik misissuisitsinissamik kalaallit kissaataat ataqqineqassasoq.

- Akuersaarneqarsinnaanngilaq ajuusaarnaqalunilu SF-p misissuinissamik siusinnerusukkut neriorsuunni aalajangiusimanngippagu, maanna nunanut allanut ministereqarfimmiileramik qanorluunniit tatineqartigigaluarunik. Unioqqutitsilluni timmisartuussinertigut Kalaallit Nunaat eqqorneqarpoq - Danmarkiunngitsoq. Danmarkilli akisussaaffigaa, Danmarkip aalajangiusimajuarpagu nunanut allanut politikki tigusinnaanngikkipput - tamatumani ilanngullu nammineq silaannartarput, Doris Jakobsen oqarpoq.

- Naatsorsuutigaara SF-p Kalaallit Nunaanni parteeqataa, IA, aamma malunniuteqarluni suliniuteqassasoq. Socialdemokratinik suleqatigiinnissamik isumaqatigiissuteqaqqammerpugut, ilaatigullu nunatta tunngaviusumik inatsiseqaleriartornissaanut naalakkersuisut nutaamik ammasumik politikkeqalernerannut sunniuteqalersimalluta. Maanna IA-p takutittariaqarpaa SF-imik suleqateqarnertik aamma atorluarsinnaallugu, Doris Jakobsen oqarpoq.

Aamma Siumup siulittaasuata Aleqa Hammondip Kuupik Kleist kajumissaarpaa oqaatsit iliuusinngorteqqullugit piumasaralugulu parteeqanni aqqutigalugu sunniuteqarnissaq.

- Suleqatigiinnissamik isumaqatigiissuterput aqqutigalugu Siumut Socialdemokratinik pitsaasorujussuarmik oqaloqatiginnittarpoq aammalu pitsaasumik qanittumillu suleqatigiilluta. Maanna piffissanngorpoq aamma Kuupik Kleistip, IA-mi siulittaasutut, piumasarissagaa Danmarkimi parteeqanni SF iliuuseqassasoq. Nunatta marluk siunissaannut aalajangiisuuvoq inuiaat marluk naalakkersuisullu marluk akornanni oqaloqatigiinnermik pilersitsinissaq, naligeeqatigiinneq ataqqillugu aammalu imminnut kissaatit pisariaqartitallu paasillugit, Aleqa Hammond oqarpoq nangillunilu:

- Kuupik Kleistip Kalaallit Nunaanni nammineq inatsisartuni iluaqutigisinnaavai, Inatsisartuni tamakkiisumik tapersersorneqarmat suliassap massuma kalaallit inuiaat tamaasa sinnerlugit saqqummiunneqarnissaa.