CIA-p misissuiffigineqarnissaanik neriorsuunni qimarratigaa

Amerikarmiut isertortumik paasiniaasarfiata CIA-p tigusanik isertortumik timmisartuussisarnermini qallunaat silaannartaannik atuisarsimaneranik misissuinissamik neriorsuutertik naalakkersuisut nutaat qimarratigaat.

De Radikalet, Socialdemokratit, SF-p aamma Enhedslisten-ip septembarimi piumasarigaluaraat tigusanik timmisartuussisarnerit arlaannaannulluunniit attuumassuteqanngitsunit misissuiffigineqassasut taava nunanut allanut ministeri Villy Søvndal (SF) maanna isumaqarpoq misissuinissaq tamaattoq pisariaqartinneqarunnaartoq.

- Kingumut sammisumik akisuumillu misissuinerit aporfigissanngikkutsigit naalakkersuisut naliliipput naammassasoq Kalaallit Nunaannut neqeroorutigeqqissallugu attuumassuteqartunut tamanut killeqanngitsumik tamakkiisumillu takunnissinnaasut, Kalaallit Nunaat isumaqaruni tamatuminnga pisariaqartitsilluni, Villy Søvndal oqarpoq.

Naalakkersuisunut tunngavik nutaaq malillugu misissuinermik ataatsimiititaliap Irakimi sorsunnermi peqataanermut tunuliaquttat misissussavai aammalu "Irakimi Afghanistanimilu sorsunnermut atatillugu Danmarkip nunani tamalaani isumaqatigiissutinik ajornartorsiuteqarsinnaanera". Partiilli naalakkersuisut septembarimi ataatsimut nunanut allanut politikkissartik saqqummiukkamillu nassuiaapput tigusanik timmisartuussisarnerit annertunerusumik misissuinermi tamatumani ilaassasut.

Taamaattumik Enhedslistenip aningaasanut siusinnerusukkullu ukiorpassuarni nunanut allanut tunngasunut oqaaseqartartuata Frank Aaenip aalajangerneq tupaallaatigaa.

- Enhedslistenimik suleqateqarnermut pitsaasuunngilaq pisimasup tamatuma misissorneqarnissaanik isumaqatigiissut apereqqaarata atorunnaarsinneqarmat. Tamanna naalakkersuisunut saqqummiutissavarput, tassami neriorsuinermik unioqqutitsinerummat, Frank Aaen oqarpoq.

Tamanna peqatigalugu eqqunnginnerarpaa timmisartuussinernik misissuinissaq pisariaqarunnaarsimasoq:

- Siullermik pingaaruteqarpoq paasissallugu qanoq pisoqarsimanersoq. Aappassaanillu tunummut sammineruinnanngilaq. USA tigusanut isertortumik programmeqaannanngilaq, tigusat nunarsuarmi sumiiffiit assigiinngitsut akornanni parnaarussivinnut timmisartuunneqartarlutiik. CIA-p isertortumik paasiniaasarfiit pasinakujuttut arlallit suli suleqatigai. Nunanili allani ministereqarfimmi aningaasat apeqqutaatinneqarpata taakkua amerlavallaarnavianngillat.

Akerlianik Venstrep nunanut allanut tunngasunut oqaaseqartartuata Søren Pindip nunanut allanut ministerip CIA-mik misissuinissamik taamaatitsiinnarneranik nersualaarpaa.

- Nuannaarutigaara Villy Søvndalip taama sukkatigisumik silarsuarmi piviusut akuersaarmagit. Tamanna pingaartumik SF-p tunuliatutaani nuannaarutigineqarsimassaaq. Villy Søvndal nersornartippara. Taamaasiornermigut nunagisamik asanninnertut iliorpoq, Søren Pind oqarpoq.

Kingullermik taamanikkut naalakkersuisut VK illua'tungiliuttullu aaqqiagiinnginnerat annertusivoq ukiut nikinneranni. Taamanikkut amerikarmiut Københavnimi ambassadøriata nalunaarutaanit paasineqarpoq naalakkersuisut VK 2008-mi kissaatigisimanngikkaat CIA-p timmisartuussisarneranik USA-p paquminartunik apeqquteqarfiginissaa, tamanut ammasumik piumasarigaluarlugu ersarissumik akissuteqartoqarnissaa tamannalu pillugu Folketingimi neriorsuuteqaraluarlutik.

Arlaannaannulluunniit attuumassuteqanngitsumik misissuisitsinani nunanut allanut ministeri Per Stig Møller (K) taarsiullugu suleqatigiissitaliorpoq, taannalu inerniliivoq tigusanik timmisartuussisarsimaneraanernut uppernarsaatissaqanngitsoq.

CIA-lli 2001-imiilli qallunaat silaannartaanni 1900 angullugit pasinartunik timmisartuussisarsimaneranik paasissutissat USA-p uppernarsarumanagillu tunuartikkumanngilai.

/ritzau/