Partiit Kalaallit Nunaat pillugu oqaaseqartartui toqqarneqarput
Folketingimi partiit assigiinngitsut Kalaallit Nunaat pillugu oqaaseqartartui maanna inissipput
Folketing-imi ilaasortanngortut suliatik aallartissinnaanngorpaat.
Ammaanermi oqallittoqareermat Christiansborg nalinginnarmik sulisoqalerpoq.
Partiit oqaaseqartartussatik ataatsimiititanilu ilaasortassatik toqqartoreerpaat. Partiit Kalaallit Nunaat pillugu oqaaseqartartui takornartaanngillat.
Talerperliit Kalaallit Nunaat pillugu oqaaseqartartui misilittagaqarluartuupput, saamerliit Nunarput pillugu nutaanik oqaaseqartartoqalerput.
Socialdemokratit 2007-mili folketingimi ilaasortaasoq, Flemming Møller Mortensen toqqarpaat. Taanna ukioq manna juunimi folketingimi ilaasortat Kalaallit Nunaanni paasisassarsiorlutik angalaneranni peqataavoq, siornatigullu Ilulissani peqqissaasutut atorfeqarnikuulluni.
- Kalaallit Nunaat takoqqillugu nuanneqaaq, ilaatigullu nuannaarutigisannik kommunalbestyrelsimut ilaasortat Uummannameersut oqaloqatigalugit. Kalaallit Nunaanni kommunini nutarsaaqqinniarluni suliat ineriartortinneqarnerat soqutiginarpoq. Kalaallit Nunaannut tunngasut suliarinissaat qilanaaraara, Flemming Møller Mortensen Sermitsiaq.Ag-mut oqarpoq.
Naalakkersuisunngortitseqataasut SF Anne Bostrup toqqarpaat, taanna 1994-imili folketingimi ilaasortaalerpoq. Anne Bostrup siornatigut Kalaallit Nunaannut tunngasut pillugit oqaaseqartartuunikuunngilaq, eqqartuussiveqarnermulli tunngasut qanimut suleqataaffiginikuullugit.
Radikale-t aamma enhedslisten nutaarluinnarnik Kalaallit Nunaat pillugu oqaaseqartartoqalerput. Jeppe Mikkelsen, radikale-t sinnerlugit kiisalu Finn Sørensen, enhedslisten sinnerlugu Kalaallit Nunaat pillugu oqaaseqartartutut toqqarneqarput.
Illuatungiliuttut misilittagaqarluartunik toqqartuipput. Birthe Rønn Hornbæk, Venstre, Per Stig Møller, Konservative, Søren Espersen, Dansk Folkeparti taakkuussapput maannakkumiit Kalaallit Nunaat pillugu oqaaseqartartuusussat. Liberal Alliance-p Villum Christensen, 2007-mili folketingimut ilaasortaasoq toqqarpaat.