Piffissaq atortariaqartarpoq, aamma tunngaviusumik inatsit pineqartillugu

2013-mi upernaakkut ataatsimiinnermi tunngaviusumik inatsit pillugu isumalioqatigiissitanik pilersitsisoqassaaq

Inatsisartut sisamanngormat nunatsinni tunngaviusumik inatsiseqalernissamik suliaq aallartippaat. (Assi: ). Leiff Josefsen

– Aallartilerfiup nalaanniippugut, naalerneranniunngitsoq, Aqqaluaq B. Egede Inuit Ataqatigiinnersoq tulluussimaarluni oqarpoq sisamanngormat ualikkut 17.20 Siumup Inatsisartuni gruppia peqatigalugu nunatsinni tunngaviusumik inatsiseqalernissami suliaq aallartinneqarnissaanik siunnersuutini Inatsisartunit taperserneqarmat.

Suliaq annertuvoq, Inatsisartunilu akunnerni marlunni minutsinilu 15-ini oqallisigineqarnerani partiit erseqqissaqattaarpaat tunngaviusumik inatsisissap suliarinissaani piffissaq pisariaqartoq atorneqartariaqartoq, suliammi taamaattut sivisuumik suliarineqartarput.

Naalakkersuisut siulittaasuat Kuupik Kleist Inuit Ataqatigiinneersoq sukumiisumik pilersaarusiornissamut Inatsisartunit taperserneqarpoq:

1) Naalakkersuisut qaammatini tulliuttuni 15-ini 2012-p naalernissaanut nalunaarusiussapput tunngaviusumik inatsimmik sulinermi naalakkersuinikkut oqaluuserisassat pingaarutillit qulaajarneqarnissaanik qulakkeerisumik.

2) Tunngaviusumik inatsit pillugu isumalioqatigiissitanik pilersitsinissaq pillugu aalajangiivigisassamik siunnersuusiortoqassaaq, taannalu 2013-mi upernaakkut ataatsimiinnermi akuerissutigineqassaaq.

3) Tunngaviusumik inatsit pillugu isumalioqatigiissitaq 2013-p kingorna pilersinneqarsinnaavoq, ilaasortallu suliaq aallartissinnaavaat, isumaliutersuutillu naammasisnissaanut aalajangersimasumik piffissaliisoqanngilaq. Soorlu Kuupik Kleist qanittukkut Ilisimatusarsimmi ima oqartoq: Tamanna ukiuni tallimani, qulini imaluunniit 25-ni suliarineqarsinnaavoq.

Kuupik Kleistip nalunaarusiami nunatsinni inuiaqatigiinni pisussaaffiit pisinnaatitaaffiillu pillugit tunngaviusumik apeqqutit qulaajarniarpai, pissaanerup ingerlanneqarnissaa, inuit pisinnaatitaaffii, innuttaasuuneq, meeqqat pisinnaatitaaffii inuiaallu namminersortuunerat.

Naalagaaffinngornissaq kissaatigisariaqarparput

Kuupik Kleist assigalugu Siumup siulittaasuata Aleqa Hammondip tunngaviusumik inatsiseqalerneq namminiilivinnerlu assigiittutut isiginngilai:

– Tunngaviusumik inatsimmi suliaqarneq annertullunilu sivisussasaoq Aleqa Hammondip takorloorpaa, naalagaaffinngornissatsinnullu suliassat pingaarutillit arlallit ilagalugu. Imaanngilarli tunngaviusumik inatsisitaarutta Danmarkimit avissaarnissatsinnut piareertugut. Ataatsimik inatsisiliornikkut naalagaaffik pilersinneqarsinnaanngilaq. Naalagaaffinngortoqartarpoq tamanna eqqarsartaatsimiippat, aningaasaqarnermi, akisussaaffimmi minnerunngitsumillu innuttaassut namminersulernissaminnut sapiissuseqaraangata.

Kuupik Kleistip nunatsini tunngaviusumik inatsiseqalernissamut suliap pilersaarusiornerani qallunaat naalakkersuisuinit aaqqiagiinngissuteqarsinnaaneq ilimaginngilaa: Naalakkersuisut isumaqarput namminersorneq pillugu inatsimmi periarfissaqartugut nutatta siunissaata eqqartornissaanut, ilaatigut namminerisatsinnik inatsiseqalernissamut apeqqutit.

Aleqa Hammondip erseqqissarpaa nammineernerulernissamut suliaq taamaallaat nunatta akisussaaffigigaa: -Naalakgaaffeqatigiinni kikkut tamarmik akisussaaffigaat tunngasiusumik inatsisip suliarinerata iluatsinnissaa.

Kattusseqatigiit Partiianniit Knud Fleischer isumaqataavoq: – Ministeriuneq Helle Thorning-Schmidt marlunngormat ammaanersiorluni oqalugiaammini tunngaviusumik inatsiseqalernissamut suliaqarnissaq taperserpaa, periarfissarlu taanna tigusariaqarparput.

Powered by Labrador CMS