Helle Thorningip eqqartuussiveqarneq misissuiffiginiarpaa
Helle Thorning-Schmidtip oqalugiarnermi naalernerani Doris Jakobsen neriorsorpaa kalaallit Danmarkimiittut atugarisaat misissorniarlugit
Ministeriunerup Helle Thorning-Schmidtip ipassaq unnukkut Folketingip ammaanersiornerani oqalugiaatip oqaluuserineqarnerani neriorsuutigaa eqqartuussiveqarnermut tunngasut misissorniarlugit, ingammillu Herstedvesterimi matoqqasumi parnaarussivimmi kalaallit atugarisaat.
Doris Jakobsenip suliaq taanna qaqippaa ilaatigullu oqarluni nunatsinni matoqqasumik parnaarussiviliornerup naammassinissaa tuavisaarniarlugu.
- Doris Jakobsenip aamma Danmarkimi eqqartuussiveqarneq eqqaavaa, kajumissaarutigerusupparalu suleqatigiilluta eqqartueqatigiissutigissagivut, ilami kalaallinut Danmarkimiittunut pissutsit tamaasa, Helle Thorning-Schmidt naggataarutaasumik oqaaseqarnermi oqarpoq.
Ammaanersiorluni oqallinneq akunnernik 15 sivisussuseqarpoq aatsaallu unnuaqeqqata kingorna naammassilluni.