Kutterimi ikuallanneq
Angallammi aalisariummi "Aleqa"-mi Sisimiuneersumi inuttat sisamat unnuaq annanniummut ikisariaqarput
Angallammi aalisariummi Sisimiuneersumi "Aleqa"-mi inuttat unnuaq pingasut sisamallu akornanni ajunaalernermik kalerrisaaripput. Maskiinaqarfik ikuallalersimavoq inuttallu sisamat annanniummut ikisariaqarsimapput. Angallat Attup kujataaniissimavoq.
Nalunaarut politiinut Kangilinnguanilu Sakkutooqarfimmut nassiunneqarpoq na. 03.50.
Kangilinnguani Sakkutooqarfik helikopterimik pissarsiniarpoq taannalu Ilulissanit aallartinneqarpoq, umiarsuillu tamatuma eqqaaniittut qinnuigineqarput ikiuiartoqqullugit.
Politiit Attumit umiatsiaaqqanik marlunnik aallartitsipput, nalunaaqutarlu 06.42 angallat tikippaat inuttallu sisamat ikillugit. Ikuallanneq siaruaassimanngiaq, inuttat angallammi matut tamaasa matusimammatigit. Taamatut paasissutissiivoq Sisimiuni politikommissær Johan Davidsen.
"Aleqa" sissamut kalinneqarpoq kisarneqarlunilu, inuttallu putsumik najoorisimagaluarlutik ajunngitsut Attumukaanneqarput.
"Aleqa" Sisimiunut kalinneqassaaq tassanilu ikuallanneq Maritime Havarikommissionimit misissorneqassalluni, Johan Davidsen paasissutissiivoq.
____________________________