Kommuninik aaqqissuusseqqinneq misissorneqalersoq

Kommunit nutaat 2009 aamma2010 millionilikkaanik amigartoorput

Anthon Frederiksen kommuninik aaqqissuusseqqinneq misissugassanngortippaa. Assi: Leiff Josefsen

Kommuninik aaqqissuusseqqinneq 2009 atuutilersoq namminersornerulernerup kingorna aaqqissuussinerit annersaattut taaneqarsinnaasoq maanna ukiut pingajuat affaanik atuutereersoq, Nunamut namminermut naalakkersuisumit Anthon Frederiksen, Kattusseqatigiit Partiiat "aaqqissuussineq" aaqqissuunneqarnialerpoq.

Pissutsini arlalinni kommuninik aaqqissuusseqqinneq naatsorsuutigisanit pitsaannginnermik ingerlanneqarpoq.

Kommunit 18 tamarmik immikkut ingerlatseriaaseqarnikut kommunerujussuarnut sisamanut allanngortinneqarnerat naatsorsuutigisamit oqimaannerusimavoq.

Ilungersunarsimavoq, soorlu Kommuneqarfik Sermersuup borgmesteria Asii Chemnitz Narup oqaatigigaa. Allaffissornikkut sipaarutissanik allanngortitsinermi naatsorsuuteqarneq anguneqarsinnaasimanngilaq, naak aningaasaqarnermut naalakkersuisoq siulleq Palle Christiansen, Demokraatit kommuninut immikkut tapiissutinik 2010-mi aamma 2011-mi sipaarniarujussuarsimasoq, kommunini allaffissornikkut sipaarutissat nassaassaanngitsut innersuussutigalugit.

Kommunerujussuit atuunnerini ukiuni siullerni amingaasarliortoqarpoq. 2009-mi kommunit katillutik 112 million koruuninik amigartoorput; 2010-mi katillutik 25 million koruuninik amigartoortut. Amigartoorutit tamarmik 137 million koruunit. Ullumi Kommune Kujalleq aamma Qaasuitsup Kommunia ilungersoqaat, Qeqqata Kommunia anersaartoqqatarpoq kommunilu sermersuaq ituillugu suliassarpassualik suli napasinnaasoq tassa Kommuneqarfik Sermersooq.

Naalakkersuisut kommunerujussuarni sisamaasuni assigiinngitsorujussuarmik atugassaqartitsineq ernummagaat. Atukkat assigiiissaarniarlugit assigiissaarinermik aaqqissuussisoqarsinnaavoq, taamaattumillu namminersorlutik oqartussat agguaassisarnermik isumammanik nutaanik perusuppoq, kommunit akissuteqarfigisaat: - Isumaqatigiissinnaannginnatta namminersorlutik oqartussat siunnersuummik saqqummiussisariaqarput.

Kommunit aaqqissuuteqqinnissaanik ataatsimiititaliaasimasup 2005-imi isumaliutissiissummini siunnersuutigaa kommunit namminersorlutik oqartussanit suliassaqarfinnik annertuunik tigusissasut, ukiut pingajuisa affaat isumaqatiginninniarnerit ingerlareersut innarluutilinnut immikkoortortaq januaarip aallaqqaataa 2011 kommuninit kisimi tiguneqarsimavoq. Tamanna namminersorlutik oqartussanut kommuninullu pakatsinarpoq, politikkikkut aammalu allaffissornikkut aaqqissuussinerup ingerlaqqinnissaa anguniarlugu uummarsaasoqaraluarpoq.

Pingasunngorneq ualikkut Anthon Frederiksen kommunit pillugit nalunaarusiaq inatsisartunut saqqummiutissavaa, taanna tunngavigalugu inatsisartut "namminersornerulernerup eqqunneqarneranit allanngortiterinerit annersaat" iluarsisassartaanik pitsanngorsaanissaq oqaluuserissavaat.

Kommunimut qinersinissaq tulleq pissaaq apriilimi marlunngornerit siullersaat 2013.

Powered by Labrador CMS