Pilertortumik qanoq iliuuseqarneq akilersinnaavoq
Mimi Karlsen, meeqqanut inuussuttunullu suliniutissamik pilersaarut naalakkersuisunut saqqummiuppaa
Meeraalluni toqqissisimasimannginnermut ersiuteqarpoq arnaq naartusoq taassumalu ilaqutaat, meeraq inunngortussaq pillugu erngerlutik ikiorneqartariaqarput.
Ilaqutariinnermut naalakkersuisoq Mimi Karlsen, Inuit Ataqatigiit marlunngornermi inatsisartut ataatsimiittarfianni meeqqanut inuusuttuaqqanullu suliniutissamik pilersaarut saqqummiutissavaa. Pilersaarummi meeqqanut inuusuttunullu pinaveersaartitsinissanut suliniutit kisimik saqqummiunneqassanngillat, aammali meeqqat inuusuttullu taakkualu ilaqutaasa immikkkut ikiorneqarnissamik tapersersorneqarnissamillu pisariaqartitsisunut suliniutit nutaat saqqummiunneqassapput.
- Pilersaarusiornerup ersersippaa erngertumik qanoq iliuuseqarnissaq qanoq pisariaqartigisoq, Mimi Karlsen oqarpoq.
Peqqinnissaqarfimmi meeqqat 0-6'nik ukiullit taakkualu qanoq iliuuseqarfigisariaqartut atornerluineq pillugu katsorsartariaqartut, juumuut aammalu peqqissaasut aningaasanik amerlanernik immikkoortitsivigineqassapput. Inunnik ikiuinermik suliaqarfimmi ilaqutariit katsorsartinnissaannut aamma ilaqutariit pikkorissartarfii amerlanernik aningaasaliiffigineqassapput, taamalu kommunini inunnik sullissiviit ikiuigasuartarnissaq anguniarlugu sulisunik amerlanernik peqartinneqalissapput. Perorsaanermi "meeeqqerivitsialak" nukittorsarneqassaaq meeqqat suli atualinngitsut ilikkagassaasa ineriartornerallu nukittorsaqqullugit, uani meeqqat nunaqarfinneersut immikkut isiginiarneqassapput.
Meeqqat inuusuttullu suliniutigineqarnisaat 2012'imi 65 million koruuninik akeqassaaq.
- Meeqqanut, inuusuttunut ilaqutariinnullu qanoq iliuuseqarnissaq inuiaqatigiit atugarissaarnerulernissaannut suliniutit pingaarnersaraat; siullermik pissutigalugu meeqqatta ineriartornerat atugarisaallu pitsaanerusut tassaammata inuiaqatigiit imminnut napatittut pigissaaneruleriartortullu tunngavigimmatigit, Mimi Karlsen oqarpoq.
Tamatuma saniatigut pinaveersaartitsinermik aammalu suligasuarneq aningaasaliineruvoq akilersinnaasoq, piffissaq sivisunerusoq eqqarsaatigalugu meeqqat inuusuttullu angerlarsimaffiup avataanut inissinneqartussat ikilisissammatigit allatigullu soorlu peqqinnissaq-, ilikkarsinnaassuseq,- aamma inuttut ajornartorsiutit piaartumik iliuuseqarnikkut annikinnerusinneqarsinnaammata.
Mimi Karlsenip naqissuserpaa meeqqanut inuusuttuaqqanut qanoq iliuuseqarnissamik pilersaarut angusaqarfiulluassappat, taava assaat ikiuussinnaasut piginissaat pisariaqartoq. Tamanna ilinniarsimanngitsut ilinniagallillu ilinniarteqqinnerisigut pikkorissartinnerisigullu anguneqarsinnaavoq meeqqat inuusuttullu pitsaanerpaamik sullinneqassappata.