Kinguaassiutitigut atornerluisarneq kingornunneqartarpoq

Juliane Henningsenip inersimasut meeraanermik nalaanni kinguaassiutitigut atornerlunneqarsimasut katsorsartiffissaannik ujartuivoq

Juliane Henningsenip inersimasut meeraanerminni kinguaassiutitigut atornerlunneqarsimasunut peqqissaanermik periarfissanik ujartuivoq. Assi: Leiff Josefsen

Kinguaassiutitigut atornerluineq pinaveersaarniarlugu sullissineq meeqqanut inuusuttunullu eqqugaasinnaasunut sammineruvoq, atornerluisartulli qanoq iliuuseriffigineqarnissaat politiinut, eqqartuussivimmut pinerluuteqarsimasunullu isumaginnittoqarfiup ingerlatassaatut nalilersugaalluni.

Misissuinerit paasinarsisippaat kinguaassiutitigut atornerluisarneq kingornunneqartartoq, meeqqat inuusuttullu atornerlugaasartut namminneq inersimasunngoraangamik atornerluisunngortartut.

Inatsisartunut ilaasortaq Juliane Henningsen, Inuit Ataqatigiit, marlunngornermi Inatsisartut ataatsimiittarfianni siunnersuuteqarpoq, inersimasut meeraanermik nalaanni kinguaassiutitigut atornerlugaasimasut katsorsartinnissaannut neqeroorummik pilersitsisoqartariaqartoq:

- Suliassaqarfik taanna ilisimasaqarfiginerusariaqarparput aamma nuna tamakkerlugu pinaveersaaertitsinissamik pilersaarummik aammalu inersimasut meeraanermik nalaanni atornerlugaasimasut katsorsartiffissaannik pilersaarusiortariaqarpugut.

Juliane Henningsenip tikkuarpaa, misissuinermit paasineqarsimasoq anaananngortartut pingajui tarmarmik kinguaassiutitigut atornerlugaasimasut, taamaattorli ataatanngortartut pillugit assingusumik paasissutissaqanngitsoq. Taamaattumik naalakkersuisunut apeqquteqaateqarpoq ajornartorsiutip qanoq annertutiginera paasiniarlugu aammalu katsorsartinnissamut pisariaqartitsisut qanoq amerlatiginerannik paasiniaalluni.

Inuit kajumissutsimikkut tapersersuisut Tasiorta februaarip aallaqqaataani 2007 pilersinneqartoq, oqarasuaat 141 atorlugu akeqanngitsumik kinaanerlu oqaatiginngikkaluarlugu nuna tamakkerlugu siunnersuisarput, neqeroorummit taassuminnga kinguaassiutitigut atornerlugaasut sulisunik ilinniarsimasunik soorlu tarnip pissusaanik immikkut ilisimasalinnik oqaloqateqarsinnaapput.

- Tasiorta imaannaanngitsumik tapersersortariaqakkamillu suliaqarpoq, kisianni sianerfigisinnaasamit 141 misilittakkat imaapput, inersimasunik meeraallutik atornerlunneqarsimasunik ikiuiniarnermi ajornartorsiutillit ajornartorsiutaat ima annertutigisarpoq, peqatigiiffiup nammineq kajumissutsimik tunngaveqarluni suliallit kisimiilluni nammassinnaanngikkaa, Juliane Henningsen oqarpoq.

- Pinaveersaartitsineq paasisitsiniaanerillu naammanngilluinnarput, kinguaassiutitigut atornerlugaasimasut qanoq amerlatigisut katsorsartinnissaminnik pisariaqartitsisut paasisariaqarpagut. Katsorsaavinnik assigiinngitsunik kinguaassiutitigut atornerlunneqarsimasunut naleqquttunik pilersitsinissaq ilungersuutigisariaqarparput, tamatuma saniatigut namminneq kajumissutsimikkut sullissisut aammalu suliamut atatillugu suliaqartunut ilinniaqqiffissat pikkorissarfissallu pilersittariaqarpagut.

Tasiortap oqarasuaataa 141 marlunngornikkut nal. 8.00-10.00 aamma sisamanngornikkut nal. 15.00-17.00 ammasarpoq. Akeqanngitsumik sianerfigineqarsinnaavoq TelePost A/S oqarasuaammik aningaasaliisuuvoq.

Powered by Labrador CMS