Qinigaaffik ataaseq - imaluunniit amerlasuut

Maannakkut qinersinermut malittarisassat naapertuilluartuunersut Naaja Nathanielsen-ip apeqquserpaa

Kalaallit Nunaanni qinerseriaaseq Naaja Nathanielsen-ip oqallisissanngortippaa. Ass.: Leiff Josefsen

Ungasinngitsukkut folketingimut qinersigatta qinersivittut ataatsitut qinersinerput nilliunneqanngilaq, nunarpulli qinersivittut ataatitut isigalugu qinersisarneq aamma Inatsisartunut qinersinerni atuutsinneqartartoq, maannakkut Naaja Nathanielsen-ip, Inuit Ataqatigiinneersup taamatut qinersisarneq ilumut demokrati naapertorlugu qinersinerusarnersoq apeqquserlugu oqallisissanngortippaa.

– Inuiaqatigiit ineriartornerannut innuttaasut sunneeqataasinnaasutut misiginissaat pingaaruteqarpoq, minnerunngitsumik maannakkut kommunit annerulersinneqareernerisa nalaani, inuiaqatigiinnilu aaqqissueqqinnerit annertuut aallartisarneqareerneranni, Naaja Nathanielsen oqarpoq.

Taanna aallaavigalugu taanna marlunngornermi ualikkut Inatsisartut ataatsimiittarfianni apeqqutigaa, maannakkut qinerseriaaseq ilumut demokratiimik naapertuilluarnermut tapertaanersoq.

Namminersornerulerlutik Oqartussat 1979 pilersinneqarmata, Kalaallit Nunaanni qinersiviit arfineq pingasunngorlugit agguarneqarput: Kujataani (qinigassat sisamat), Qeqqani (qinigassat tallimat), Avannaani (qinigassat sisamat) kiisalu qinersiviit immikkoortut tallimat; Uummannaq, Upernavik, Qaanaaq, Tasiilaq kiisalu Ittoqqortoormiit. Partiit marluk Siumut aamma Atassut taamani angeqqatigiilingajapput, partiilli Inatsisartuni sinniisaat aappaata 13-iupput aappaata 8-llutik, tamatumunnga pissutaavoq avinngarusimasuni tallimani Siumup ajugaanermigut, Qaanaamiit kiisalu Ittoqqortoormiiniit qinigaasut amerlasuunit taaguunneqartariaqarsimannginnerat.

1998-imi Kalaallit Nunaat tamarmi qinersivinngorpoq ataaseq.

Taamatut qinerseriaaseqarnerup ajunngitsortai ajortortaalu Naaja Nathanielsen-ip taakkartorpai: – Arlalinnik qinersiveqarneq qimanneqarpoq, politikerit nuna tamaat sulissuttussaammassuk namminneq najugaqarfitsik namminnerlu qinigaaffitsik salliutinnagu. Ataatsimut nuna tamakkerlugu qinigaaffinngortinnerata ajortortaatut taaneqarsinnaavoq, sumiiffiit ikittuinnarnik taasisinnaasullit Inatsisartuni sinniisuutitaqarnissaminnut periarfissaasa annikillinerat.

Qinersiviup ataasiinnanngortinnera arlaleriarluni Inatsisartuni oqallisigineqartarpoq, mannali tikillugu suli siornatigut qinerseriaatsimut utersaarnissaq amerlanerusunit akuerineqarnikuunani. Inatsisartuni ilaasortat nuummi najugassaqartitaanissartik pisinnaatitaaffigaat, Inatsisartunili ilaasortat arriitsumik najukkaminniit nunatsinni illoqarfiit pingaarnersaannut nooralerlutik.

Demokratiili naapertorlugu sinniisuutitat ilumut inissitsitertarnersut apeqqutaavoq. Sumi najugaqarneq apeqqutaava imaluunniit angutit, arnat, inuusuttut, utoqqaat, illoqarfimmiut, nunaqarfimmiut, aappalaaartunik qernertunillu nujallit, suliffeqanngitsut suliffillillu, piniartut allaffimmiullu, qallunaat kalaallillu tamarmik, Kalaallit Nunaanni Inatsisartuni siniisuutitaqarnissaminnut periarfissaat naammannersut apeqqutaanerluni.

Powered by Labrador CMS