Inuk nersorniarneqaqqippoq

Kalaallit filmiliaat nunat tamalaat akornanni filmfestivalini qaloorpoq

Fyrst Albert, Monaco aamma professor Jean Malaurie Uummannami filmip Inuk plakatia tigummigaat. Assi: Nammineq pigisaq.

Mike Magidson, kalaallit filmiliaannik "Inuk" ilitsersuisup pokaliisivini anginermik taarsertariaqassavaa.

Filmi imaannaq akissarsisinneqaqattaarpoq, soorlu sap. ak. naanerani filmip nersornaatit aqqanilissaat pissarsiaraa.

Tamanna amerikami filmfestivali Port Townsend Film Festival ingerlanneqarmat isiginnaariat filmi pitsaanerpaatut toqqarmassuk. Taamaasilluni "Inuk" kalaallit filmiliaannit nunat tamalaat akornanni nersuiniutinik amerlanerpaanik pissarsisimalerpoq.

Filmi, suli nunatsinni takuteqqaarneqanngitsup nukappiaraq sumiginnagaasoq oqaluttuaraa, Inuk Nuummeersoq Uummannami meeqqat angerlarsimaffiannut pisinneqartoq piniartumit Ikumamit ukiukkut sivisuumik qimussimik angalatinneqarpoq.

Filmi ilaatigut Fyrst Albertimit aningaasaleeqataaffigineqartoq ukiortaami Hollywoodimit sanaatut ililluni saqqummeqqissaaq taamalu amerikami filmertarfinnut naleqqunnerulissalluni.

Maannakkorpiaq filmimi pingaarnertut inuttaatitaasoq Ole Jørgen Hammeken aamma Mike Magidson USA'miipput, "Inuk" filmfestivalini allani sisamani peqataasussaq malittaralugu.


Powered by Labrador CMS