- Ajugaasuuvorlu...
KODA Greenland Award kalaallinut piukkunnartunut pingasunut ippassaq unnukkut tunniunneqarpoq
Ippassaq unnukkut immikkoortuni pingasunut KODA Greenland Award 2010 kalaallit pikkunnartut tunissuterpassuarnik tunisipput neruslaarneqarlutillu.
Ukioq 2010-mi nersornaat erinniortumut taalliortumullu Sussaneersumut John Geisler Sandgreenimut tunniunneqarpoq.
John Geisler Sandgreen pillugu tunngavilersuutigineqarput:
Nunatsinni 2010-mi nipilersorneq eqqarsaatigigaanni taava nipilersoqatigiit Sussat erngerluni eqqaaneqartarput, nipilersoqatigiillu siullutat, taalliortoq erinniortorlu John Geisler Sandgreen. Ukioq taanna Sussat cd-liorput taaguutilimmik ”sila qaammareerpoq”, taannalu nunatsinni tamarmi nipielrsornikkut nuannarineqartupilussuanngorpoq nuannersunik qungujunnartunillu taallaqarnertik peqqutigalugu. Sussakkut Cher assigalugu nipitaa elektroniskinngortissimavaat.
- Inuunermini anguniagaraa inoqatiminik nuannaalersitsinissaq nukissaqalersitsinissarlu. Sussakkut cd-mik saqqummersitsigamik nunatsinni piumaneqarnerpaalarput, ukiorlu manna cd-liaat sølvimik cd-innappoq. Cd-liaat ”Sila Qaammareerpoq” ippassaq 5.000-nngorlugu tunisaanermut kuultimik cd-innappoq.
Naliliisartut nalorninngilluinnarpaat 2010-mi KODA-p nersornaasiuttagaa John G. Samuelsenimut tunniunneqassasoq
Piukkunnartunut nersornaasiuttagaq Uummammi nipilersoqatigiinnut Jenseeraq Olsenimut Angutimmarik Petersenimullu tunniunneqarpoq.
Jenseeraq Olsen aamma Angutimmarik Petersen pillugit ima tunngavilersuisoqarpoq:
- JJenseeqqap Angutimmariillu rockeriaaseq sallaannerusoq funk rockimut bluesinullu eqqaanartoq ilisaritippaat. Erinarsuusiaat tusaajuminarput, taallai eqqarsalersitsisuullutik ataatsimut kattullutik tusarnersut.
Nipilersukkat pillugit atuagassiami Fuzzimi Uummatikkut cd-liaqqaavat pillugu ima allassimasoqarpoq:
”Torrak nuannerlu nipilersiriaaneq bluesimtu qanittoq taama nuannaalersitsimmat. Jenseeraq Olsen aamma Angutimmarik Petersen cd-mik suliarilluakkamik saqqummersitsipput. Cd-liaat nipilersorlugu naliliinissara allappara. Saqqummersitami atugaat siulleq ”tusaannga” nuannerluinnarpoq, Jenseeraq Olsenimit suliaasoq. Oqaasertai nunatsinni taalliortorsuatta suliaannit ajornerunngillat”.
Ukiumi qaangiuttumili Jenseeqqap Angutimmariullu nipilersoqatigiit Uummat peqatigalugu takutippaat cd-liartik taamaallaat nuannerineqanngitsoq nunatsinnili nipilersortussatut aamma pimaneqarlualerlutik.
Ataqqinaammik nersornaat Aasianniit Peter Olsen taalliortartoq, saqqummersitsinsartoq, tusarnaartitsinernik festivalinillu aaqqissuussisartoq ataqqinninninniummik nersornaaserneqarpoq.
Inuusuttuulluni nipilersoqatigiinni assigiinngitsuni nipilersoqataasarsimavoq, taalliortutullu nuutit cd-lu 1992-mi "3911" saqqummersitseqataaffigalugu, cd-liaalu ”aasalersoq-una” 1998-mi nipilersoqatigiit Tupilak peqatigalugu. Minnerunngitsumillu Peter Olsen Olsen Kidsikkunni nunatsinni meeqqani nipilersortartuni nuannerineqarnerpaagunartumi tunuliaqutaavoq. Taakku cd-liaqqaaraat "Anika-mut" 2001-mi saqqummertoq 5.000 sinnerlugit tunineqartoq. Olsen Kidsikkut 2003-mi allamik cd-mik saqqummersitsipput, taannalu aamma 5.000 sinnerlugit tunineqarpoq. 2009-p tungaanut Olsen Kidsikkut tallimanik cd-liorput, nipilersukkat Peter Olsenimit taalliarineqarlutillu erinniorneqartunik. Olsen Kidsikkut suliarinerannut atatilllugu Peter Olsenip saqqummersitsisarfik ”Olsen Music” pilersippaa Isit Studiomi Angu Olsenilu suleqatigalugu ullumikkut cd-it 30-t missaat saqqummersissimallugit.
Nipilersortartut aaqqissuussaanerat, tusarnaartitsinerillu festivalillu eqqarsaatigalugit Peter Olsen annertuumik sulisimavoq. Peter pimoorussisuuvoq. Inunngorfimmini Sisimiuni 1978-mi nunatsinni nipilersoqatigiit peqatigiiffiat siulleq pilersitseqataaffigaa. 1998-mi Aasianni nipilersoqatigiit peqatigiiffianni siulittaasunngorpoq, NIPIAA ROCKFESTIVAL-ip pilersinnissaa isumassarsiaralugu, tassani ukiut ingerlanerani festivali 12-it ingerlanneqarput suli siuttuuffigisai.
2001-miit 2005-mut aamma ”Mini Agpik Jam Aasiaat festival” aaqqissuuppaa, tassalu imigassartaqanngitsumik nipilersornermik festivali Canadami Nunavimmi Kuujjuarmi naggueqatitta nipilersornikkut festivalianut assingusoq.