Nunatta Eqqumiitsulianik saqqummersitsivissaa kunngikkormiunit nersornaaserneqartoq
Illussanik titartaasartoq tusaamasanngoriartortoq Bjarke Ingels arfininngornermi kunngissakkut kulturikkut sulialinnut nersornaasiuttagaanik 500.000 koruuninik akissarsisinneqarpoq
Danski illussanik titartaasartoq tusaamasaq Bjarke Ingels piffissaq kingulleq arlalinnik nersornaatisoq, ilaatigut nunatsinni eqqumiitsulianik saqqummersitsivissamik titartaasuuvoq.
Arfininngornermi unnukkut kunngikkormiunit aamma nersorinnissut pivaa, 36-inik ukiullip Kunngissap Frederiup nuliatalu Maryp kulturikkut nersorinninniutaa 500.000 koruuninik aningaasartalik pissarsiarigamiuk.
Nersornaat Bikubenfondep 2004-mi kunngissakkut katinneranut atatillugu tunniussaraa agguaassineq siulleq 2005 ingerlanneqarluni.
Kunngissakkut naapertorlugit Ingels - taanna nunarsuarmi inuit 100 suliniuteqarnerpaat akornannut aamma toqqagaasoq, nersornaamik tunineqarnissaminut piukkunnarnerpaajuvoq.
- Nunarsuaq tamarmi Bjarke Ingelsimut ammavoq, suleriaasia meeqqamut pinnguarusuinnarluni pisumut assersuunneqarsinnaavoq, killilersuutit ajornartorsiutillu angummut sulerusussuseqartumut isumaqarpallaanngillat, Kunngissakkut nersorinnissummut tunngavilersuutaasa ilaat taama nipeqarput.
36-inik ukiullip Ingelsip 2006-imi Bjarke Ingels Group (BIG), tamatuma siornagut titartaasarfik PLOT pilersereernikuuaa.
Danmarkimi sanaartukkat titartarsimasaasa tusaamasaanersaraat Islands Brygges Havnebad, VM Husene aamma VM Bjerget i Ørestad kiisalu den danske Expo Pavillon Shanghai'miittoq.
Maannakkorpiaq pyramidetut isikkulik New Yorkip immikkoortuani Manhattanimiittussaq suliarileruttorpaa aammalu Kalaallit Nunaata Eqqumiitsulianik saqqummersitsivissaa Nuummiittussaq ingerlallugu, sanaartornissaq aallartinniarlugu aningaasaateqarfik aningaasassarsiorluni sulileruttorpoq. Saqqummersitsivissaq 200 million koruunit ataallugit akeqarnavianngilaq ingerlanneqarnissaanullu ukiumut 10 million koruunit atorneqartassasut naatsorsuutigineqarluni.