2012-imi aatsitassarsiortussarpassuit

Nunatsinni aatsitassarsiorfiit Tunup avannaani Citronenfjord'imi, Kujataani Kangerluarsummi aammalu Nuup eqqaani Isukasiani aatsitassarsiorfiit siulliit pilersinneqartussaagunarput. 2012'imi piiaavissanik siullernik sulineq annertooq ingerlanneqassaaq - piiaanissamut akuersissutit tunniunneqassappata

Aatsitassarsiornermik suliallit kajumigeqqusaarlutik ilinniarfinni innuttaasunillu ataatsimiisitsisarput siunissami aatsitassarsiornissaminnik paasisitsiniaallutik aammalu kalaallinut sulisinnaasunut pilerigeqqusaariartorlutik.

Arlallit 2012-p ingerlanerani aatsitassarsiorfinnik pilersitsiortornissartik naatsorsuutigaat - aatsitassarsiornissamut akuersissutinik pissagunik.

Tamanna pisortat aatsitassarsiorusuttunik allattugaataanni takuneqarsinnaavoq, ilaatigut aningaasaqarneq pillugu politikkikkut nalunaarusiami atuarneqarsinnaavoq.

Aatsitassarsiornermik ingerlatassat siulliit makkuupput:

Tunup avannaani Citronenfjordimi aqerlumik zinkimillu piiaasoqarusuppoq. Tamaani akilersinnaassutsimik naliliineq 2011-mi inaarneqassasoq naatsorsuutigineqarpoq. Suliffeqarfik aatsitassarsiornermik ingerlatserusuttoq tassaavoq Ironbark Zinc Ltd. Aatsitassarsiorfimmik pilersitsiniaaneq ukiuni pingasuni 2012-imiit 2015 tikillugu ingerlanneqassasoq naatsorsuutigineqarpoq. Imaassinnaavoq 2015-imi aatsitassanik piiaasoqalersoq inuit 200 imal. 300 sulisoralugit.

Isukasiani Nuup eqqaaniittumi savimminissamik piiaasoqarusuppoq. Suliffeqarfissuaq piiaarusuttoq tassaavoq London Mining Greenland A/S. Tamaani akilersinnaassutsimik naliliineq 2011 naammassillugu tunniunneqarnissaa naatsorsuutaavoq, avatangiisinik naliliineq januaarimi 2012 naammassissangatinneqarpoq. Aatsitassanik piiaasinnaanermut akuersissut tunniunneqassappat, 2012 aatsitassarsiorfimmik pilersitsineq aallartinneqassaaq neriuutaavorlu 2015 piiaaneq aallartereersimassasoq. Aatsitassarsiorfimmik pilersitsinermi inuit 1.100 sulisorineqarnissaat naatsorsuutigineqarpoq, aatsitassarsiornerullu nalaanni sulisut 500 naatsorsuutaapput.

Killavaat Alannguat (Kangerluarsummi) Narsap Qaqortullu akornanni, aatsitassat qaqutigoortut aamma eudialyt piiarniarneqarput. Suliffeqarfik Rimbal Pty Ltd. (Tanbreez) ngelatsisoralugu. Akilersinnaassutsimik naliliineq 2011 naammassissasoq naatsorsuutigineqarpoq. Tamaani aatsitassarsiorfimmi pilersitsiniaaneq annikitsunnguuvoq, piiaanerlu 2012 aallartissasoq naatsorsuutigineqarluni, tassa akuersissummik pissarsissagunik. Suliffeqarfissuup naatsorsuutigaa 90-inik sulisoqarnissi.

Maarmorilik. Angel Mining A/S neriuppoq aqerlormik zinkimillu 1012 tunisassiulersinnaalluni, sulisussat 100 pisariaqartinneqassasut naatsorsuutigineqarpoq - akuersissummik tunineqassagunik.

Nalunaq. Angel Mining A/S, Nalunami Nanortaliup eqqaaniittumi kultisiorpoq 70-inik sulisoqarluni.

Aatsitassarsiorfinni aappagumut piiaanissamik naatsorsuuteqartuni inuit 1.600 miss. sulisorineqarnissaat naatsorsuutigineqarpoq.

Aatsitassarsiorfinni tulliuttuni tunisassiulersinnaaneq qaqugu pisinnaasoq suli ilisimaneqanngitsut tassaapput sineriammi Ammassallup Illoqqortoormiullu akornanniittumi, tamaani Platina Resources Ltd. kuultisiorniarpoq, mineralillu platin aamma palladium piiarneqarusupput sulisut 300 aamma 500 akornanniittut atorlugit. Nuup kujataani Qeqertarsuatsiaani, tamaani True North Gems rubininik safirinillu piiaaneranni sulisut 50-t missaanniipput. Kiisalu Kangerlussuarmi Sartartumi, Hudson Resources Inc. aatsitassanik qaqutigoortunik alioqqinnillu piiaassamaarput inuit 300 aamma 500 miss. sulisoralugit.

Kuannersuit allattugaatini ilaatinneqanngilaq. Tamaanili misissueqqaarnerit pisariaqartut maanna ingerlanneqarput ukiuni arlalinni pisussaallutik, suliffeqarfillu Greenland Minerals and Energy kalaallinik sulisussarsiorppoq, canadamiut qaartiterisartut atorunnaarlugit, qaartitigassanut misissueqqissaarnerni pisariaqartinneqartunut nunaqavissunit suliarineqartalernissaat anguniarlugit.

Powered by Labrador CMS