Siumup ivigaasanik arsaattarfiit taperserpai
Siumut pingaartippaa nunatsinni timersornikkut atukkat nunani allani atukkanut assersuunneqarsinnaasariaqartut aamma pissaassuseq eqqarsaatigissagaanni, Siumukkut politikkikkut oqaaseqartartuat isumaqarpoq
Niels Thomsen Demokraatineersoq aamma Olga P. Berthelsen, Inuit Ataqatigiit ivigaasanik arsaattarfinnik pilersitsinissaq assortuussutigaat. Demokraatit siunnersuutigaat ivigaasanik arsaattarfiit pingasut Nuummi, Sisimiuni Ilulissanilu pilersinneqarnissaannut aningaasaliisoqassasoq, Inuit Ataqatigiinnit nuna tamakkerlugu siammarneqarnerunissaanik amerlanernillu iluaqqutaalernissaanik kissaateqartut.
Maannali Niels Thomsen Siumup politikkikkut oqaaseqartartuanit Malik Berthelsenimit taperserneqarpoq, taanna isumaqarpoq timersornerup ineriartoqqinnissaa anguniarlugu pisoqartariaqartoq.
- Nunatsinni arsaattarfiit siulliit ukiut foorut matuma siorna sanaartorneqarlutik aallartipput, kingornalu ineriartortinneqaqqigatik, Malik Berthelsen oqarpoq.
- Qularutigineqassanngilaq Siumut nunatsinni ivigaasanik arsaattarfinnik pilersitsinissaq tapersersuimmat, soorlu takuneqarsinnaasoq 2010-mili Siumup qulakkeerinneqataammat, taama suliniarnissamut aningaasanut inatsit aqqutigalugu illuartitsisoqarneratigut, taanna tikkuaavoq.
- Kalaallit Nunaat namminersortunngornissami tungaanut ingerlavoq. Nunatut arsaattartulittut pissusilersornissaq aamma pingaaruteqarpoq. Tamatuma soorunami nassatarissavaa, Kalaallit Nunaat siunissami nunarsuaq tamaat arsaattartut kattuffiannut FIFA-mut ilaasortaasoq. FIFA-mut ilaasortanngorsinnaavugut aatsaat ivigaasanut arsaattarfinnut piumasaqaatit naammassisinnaagutsigit, Malik Berthelsen oqarpoq.
- Nunatta namminiilivinniissaa ivigaasanik arsaattarfeqalernissatta tungaanut utaqqisariaqanngilarput, isumaqarpugullu pingaaruteqartoq, tamanna pitsanngorsarniarlugu nammineq suliniuteqartariaqartugut, Malik naqissusiivoq.
- Nunarpassuit timersorneq timersortartullu atugaat aallaavigalugit imminnut nittarsaattarput.
- Taamaattumik Siumumit maannangaaq oqaatigisinnaavarput, arsaattartut nunanit tamalaaneersut nunatsinni ivigaasanik arsaattarfinnut piginnaassutsiminnik takutitsiartorlutik, innuttaasunit isumassarsiortorfigineqarlutik inuusuttunillu timersornissamut kajumissuseqalersitsiartorlutik tikeraartalernissaat qilanaaraarput.