TP paatsuungavoq
Kalallit Nunaanni tusagassiortut peqatigiiffiat, Tusagassiuinermi Sulisut Peqatigiiffiat, sulisunik soraarsitsinermi peqataanngialaq
Tallimanngornermi ullaakkut KNR'imi sulisut arfineq-marluk soraarsitaallusut allagarsitinneqarput. Soraarsitaasunit arfineq-marlunnit arfinillit tusagassiortut peqatigiiffiannut, Tusagassiuinermi Sulisut Peqatigiiffiat (TP) ilaasortaapput, taamalu Dansk Journalistforbundimut.
Soraarsitsineq TP nittartakkamini tusagassiortut.gl taavaa "KNR'imi Soraaarsitarpassuit".
Sipaarniarneq pissutigalugu KNR'ip suliffiit arfineq-marluk apriilip aallaqqaataa 2012 aallarnerfigalugu atorunnaarsissavai.
- KNR'ip aningaasaqarnera imminut ataqatigiissinniarlugu sulisut taama amerlatigisut soraarsittariaqarnerat alianarpoq, KNR'imi sulisut sinniisaat Leif P. Hendriksen, TP nittartagaanut oqarpoq. Taanna sisamanngormat soraarsitsinissaq pillugu tusarlerneqarpoq.
TP paasissutissiivoq sulisut soraarsitaasut tallimat KNR'imi ukiut 20 sinnerlugit sulisuunikut aammalu suliffik aalajaaffigalugu unneqqarillutillu sulisuusimasut. Taamaattumik TP soraarsitsinissamik tusarlerneqarsimannginnertik tupigusuutigaa, TP siulittaasua Mariia Simonsen, oqarpoq.
- Suut tunngavigalugit suleqataasut taakkorpiaat soraarsinneqarsimanersut ilisimanngilarput, siulittaasoq oqarpoq, taassuma aamma maluginiarpaa soraarsitat ilaqarmata, sulisunik ukiorpassuarni aalajaallutik unneqarillutillu sulisimasunik.
- Sulisunik soraarsitsinissamik pilersaarusiornermi TP peqataatinneqannginnatta, soraarsinneqartut ikiorserneqarnissaannut pitsaanerusumik piareersimasinnaasimanngilagut. Kisianni ulloq tamaat pineqartut ikiornissaat tapersersornissaallu anguniarlugit telefonikkut naapillugilluunniit oqaloqatigivagut, Mariia Simonsen TP nittartagaani allappoq.