KNR ikilisaavoq

KNR-imi pisortaqatigiit ullumi atorfillit arfineq marluk soraarsittariaqarlugit nalunaarfigaat. KNR-imut aningaasaliissutit sulisorisat amerlassusaannut ukiuni aggersuni naapertuunnissaat qulakkeerniarlugu taamaaliortoqarpoq.

Ivalo Egede ukioq ataaseq qaangiummat tusagassiinermit nalunaarut tunniuppaa, inerniliussaqartoq - tusagassiiviit aningaasaliiffiginerusariaqartut. Assi: Leiff Josefsen

KNR'ip pisortaa Ivalo Egede ullumi tusagassiivinnut nalunaaruteqarpoq, aningaasaqarneq pissutigalugu KNR'imi sulisut arfineq-marluk soraarsittariaqarlugit.

- Innuttaasunut kiffartuussivimmi Kalaallit Nunaata Radioani aningaasaqarnikkut periarfissat ukiuni kingullerni annikilliartorsimapput, Ivalo Egede tikkuaavoq.

2010-mi KNR 400.000 kr.-inik ukiup ingerlanerani sipaarfigineqarpoq, 2011-milu aamma marloriarluni sipaarfigineqarpoq, sipaakkat katillugit 950.000 kr.-iullutik. Tusagassi­ui­nermi Sulisut Peqatigiiffiat (TP) akissaatit pillugit isumaqatigiissut nutaaq aamma KNR-ip aningaasaqarneranut 2010-mi 2011-milu nammakkiisimavoq.

Aningaasat utaqqiisaasumik inissianut atorneqartartut Namminersorlutik Oqartussat 2010-mi qitiusumut katersorpai. Tamanna KNR-ip tapiissutisiarisartagaannit ukiut tamaasa 1,8 mio. kr.-it tiguneqartalernerinik KNR-imut kinguneqarpoq, pisortallu piffissami pineqartumi utaqqiisaasumik inissiamik tunniussisinnaagaangata aatsaat tassannga aningaasanik atuisoqarsinnaasarluni.

Aallakaatitassiornerup 2012-imi annikillisaavigineqartariaqarsinnaanera KNR-imi pisortaqa­tigiit pisariaqalersinnaasoraat.

- Tamanna assut ajuusaarnar­poq. Sulisut pikkorissut tunniussimalluinnartullu soraarsissallugit nuannin­ngitsoorujuuvoq, Pisortaq Ivalo Egede nangillunilu:

- Innuttaasunilli kiffartuussinissamik pisussaaffipput naammassisinnaaniassagutsigu tusagas­siornermillu isornartorsiorfiusumik, qaammarsaanermik, ilinniartitsinermik aliikkusersui­nermillu tunniussaqarsinnaassagutta KNR-imi sipaarneroqqissinnaanerput killeqarpoq.

- KNR-imi ingerlatsinerup pitsanngorsaaviginissaa ingerlatiinnassavarput. KNR-imili aaqqissuisoqarfiit mikisuummata, sulisut sulinngiffeqarneri, qitornamik napparsimasoorneri imaluunniit qaangiuttoornermut taarsiullugu sulinngiffeqa­raangata ­suleqataasunut annertuumik sunniuteqartarpoq, pissutsillu taamaannerat peqqin­nar­tuunngilaq. Aamma sulisut taarserarnerinik pilersitsisarpoq, tamannalu aamma pitsaa­suu­nani, pisortaq isumaqarpoq.

- Piffissaq ungasinnerusoq eqqarsaatigalugu – pisinnaalerutta – freelancerit amerlanerusut suliassanut aalajangersimasunut atornerulerusuppagut. Kisianni inuiannguit kiisalu nunarujussuit tusagassiutitigut sullisissagaanni akia assigiippoq. KNR-imi tusagassiuuteqarneq pillugu politikkissaq ujartorparput, inuiaqatigiinni pisariaqartitat suliarineqarsinnaanissaat angujumallugu. Tusagassioriaaseq isornartorsiuisinnaasoq aamma nuna tamakkerlugu ilanngutassiorsinnaasoq pisariaqartipparput. Aamma innuttaasunut qaammarsaaneq aliikkuisersuinerlu torrallataq pisariaqartinneqarpoq, ilami nunannguarput imaannanngitsorsuaq tusagassiuutini malunnartumik saqqummersittariaqarpoq, Ivalo Egede oqarpoq

KNR PILLUGU PAASISSUTISSAT

Aningaasaliissutit iluanni suliaqarneruneq

KNR-imi aningaasaqarneq ukiuni arlalinni tamaviaarnartuusimavoq. Siullertut KNR suliatigut ukiut ingerlanerini annertusiartorsimavoq. Siullermik radiomuinnaq aalla­kaatitassior­toqartar­poq, taava TV internettilu takkupput, KNR-imullu aningaasaliis­sutaasartut annertoqataanik annertusaa­vigine­qarsimanatik. Aappassaattullu TV-mi atortunut digitaliusunut 2007-imi pisiarineqar­tu­nut KNR suli akilersuivoq. 2024-ip tungaanut akilersuisoqassaaq, ukiorlu 2011-imi 2 mio. kr.-inik aningaasartuutaavoq.

Pisariillisaaneq

KNR ukiuni kingullerni marlunni ingerlatsinikkut pitsanngorsaasimavoq aningaasaqarnik­kullu sukannersumik aqutsisimalluni. Allaffissornikkut atorfiit marluk 2010-mi atorunnaar­sinne­qarput, 2011-milu immikkoortortaqarfinni pisortat ikilisarneqarput. Pisortatut atorfiit marluk atorunnaarsinneqarput, atorfiillu inuttaqanngitsut arlariit inuttaleqqinneqar­tussaanatik. KNR-ip aningaasaqarnermut pisortamut aningaasartuutit annikillisarniarlugit suliassat suliffeqarfiup avataani suliarineqartalissapput. Taxanut, oqarasuaatinut internettumullu aningaasartuutit sipaarniarfigineqarput, kantiina matuneqarpoq, angalanerillu ilinniartitaanerlu annertuumik sipaarniarfigineqarlutik.

Powered by Labrador CMS