Sisimiuni silami timigissartarfik

Tallimanngormat septembarip 30-ianni Qeqqata Kommuniani borgmesterip Hermann Berthelsenip, Nalunnguarfiup eqqaani Sisimiut silami timigissartarfittaavat atoqqaarfissiorpaa

Borgmester Hermann Berthelsenip tallimanngormat Sisimiuni silami timigissartarfittaaq atoqqaarfissiorpaa. Taamaasilluni Nalunnguarfiup eqqaata tamarmi sammisaqartitsivinngorlugu nutaanngorsarnera naammassineqarpoq. Ass.: Qeqqata Kommunia Timigissartarfittaani timigissarnernut assigiinngitsunut ilitsersuisoqarpoq, tallimanngornerlu kikkunnut tamanut akeqanngilaq, aamma ataasinngorpat marlunngorpallu, kikkut tamarmik misiliiniassammata. Ass.: Qeqqata Kommunia

Qeqqata Kommuniani atuarfiit, suliffeqarfiit innuttaasullu atoqqaarfissiortitsinermut qaaqquneqarput, tassani kommunip fysioterapeutia atortut assigiinngitsut atornissaannik siunnersuillunilu najoqqutassiissalluni, kommunimi paasissutissiinermik sulisoq Anne Hjortkjær tusagassiorfinnut nalunaarutikkut oqaluttuarpoq.

Kommuni takkuttunut tamanut paarnanik sodavandinillu sassaallissaaq.

- Timigissartarfiup atoqqaarfissiorneqarneratigut Sisimiuni Nalunnguarfiup eqqaani "Illoqarfivit Qorsooqqissortaanik" ineriartortitsineq kusanartumik naammassineqarallarpoq, Anne Hjortkjær tikkuaavoq.

Ukioq manna siusinnerusukkut BMX-tarfik, issiaviit naasunik ikkussuinerit, taseq kaajallallugu pisuttuartarfik atoqqaarfissiorneqarput.

- Timigassartarfiup atoqqaarfissorneratigut illoqarfiup kulturimut sunngiffimmilu sammisaqartitsiviani timi atorlugu sammisaqarnissanut periarfisat suli pitsaanerulerput, Anne Hjortkjær naliliivoq.

Taassuma paasissutissiissutigaa silaannarissarusukkaanni timigissarusullunilu, atoqqaarfissiornermullu peqataasinnaanani, fysioterapeuti ataasinngornermi oktobarip 3-anni nal. 16-17 aamma marlunngornermi oktobarip 4-aanni nal. 19-20 unnukkut sungiusartitsissasoq.

- Unnukkut sungiusarnerit tamanut ammapput, pilerlaanut sungiussisimasunullu, inuusuttunut utoqqarnullu, paasissutissiinermik sulisoq oqaluttuarpoq.

Powered by Labrador CMS