Narsami Inuilip sanaartornera namminersorlutik oqartussat ilinniarfigisariaqarpaat

- Islandimiit entreprenørit inatsisit maleruagassallu nalinginnaasut unioqqutinnissaannut akuerineqarsimagunarput, Kalistat Lund oqarpoq

Siorna aasakkut Islandimiut Inuilip eqqaani sanaartulermatali ajornartorsiuterpassuaqarsimavoq, Kalistat Lund oqarpoq. Narsaq Foto

- Neqeroorut immaqa pappilissami akikitsutut isikkulik, inuiaqatigiit isaanniit akisoorujussuanngortussaavoq. Taamaattumik Namminersorlutik Oqartussat Narsami sanaartorneq ilinniarfigisariaqarpaat,” taama oqarpoq Kommune Kujallermi Inuussutissarsiornermut Suliffeqarnermullu ataatsimiititaliap siulittaasua Kalistat Lund.

- Kommunimi nuannaarutigisorujussuuarput Namminersorlutik Oqartussat aningaasaligaanik sanaartugassanik kommunimut takkuttoqaraangat. Sanaartukkammi akileraarutinik isertitaqarfiusarput, suliffeqarfiit najukkamiittut suliassaqartarput, nutaanik suliffissaqartarpoq ilinniartunngortoqartarlunilu.

- Tamakkuli pinngitsuuissimapput INUILI-mi sanaartornermut tunngatillugu, Kalistat Lund oqarpoq.

- Islandimiut ingerlatseqatigiiffiatali suliassamik tigusineraniit ajornartorsiutit tulleriiaaginnarsimapput.

- Ingerlatseqatigiiffimmi inatsisit ileqqullu nalinginnaasut saneqqutaarnissaannut periarfissinneqarsimagunarpoq, isumaqarpoq.

- Avataaniit suliartortut atorneqarsimapput akuersissuteqanngitsumik, taamaattumik kommuni politiinut unnerluutiginnittariaqarsimavoq. Sulisut innuttaasullu isumannaatsuutinnissaat arlalippassuariartumik saneqqutaarneqartarsimapput. Sanaartorfiusoq piffissap ilaani ungaluneqartarsimanngilaq, aqqusinermi putorsuaq assiaqutserneqarsimanngilaq aamma sulisut isumannaatsuutinnissaat ajornartorsiutaajuarpoq, Kalistat Lund oqarpoq.

- Ataasiaannarani akissarsisitsinissaq ajornartorsiutaasarsimavoq, taamaattumik kommunip aningaasivia innuttaasunut ikiuuttariaqartarsimavoq, akissarsinngitsoorneq pissutigalugu akiligassatik akilersinnaasarsinnaanngimmatigit.

- Aammattaaq ingerlatseqatigiiffiup ilinniartunik il.il. atorfeqartitsinissamik piumasaqaat malissinnaasimanngilaa, oqarpoq.

- Taamaattumik Kommune Kujalliup pisortanut akisussaasunut sanaartorneq aallartimmalli arlaleriartumik sakkortuumik ajornartorsiuterpassuit maluginiaqqusarsimavai – taamaalillutik sanaartornermut akisussaasut oqarsinnaannginniassammata piffissaagallartillugu mianersoqquneqarsimanatik.

- Maannakkorpiaq sanaartorneq uninngavoq, sulisut akissarsiaqaratik angerlartinneqarsimapput aamma Namminersorlutik Oqartussat kinguneqartitsisimapput isumaqatigiissullu atorunnaarsissimallugu. Maanna Namminersorlutik Oqartussat ingerlatseqatigiiffimmik allamik nassaarniartussanngorput INUILI-mi sanaartukkanik naammassinninniartussanik.

- Sinneruttorli tassaavoq kinguaattoorneq, tamatumalu kingunerisaanik Inuussutissalerinermik ilinniarfimmut akornutaasoq, Kalisat Lund oqarpoq, isumaqarlunilu kukkunertik tamanna namminersorlutik oqartussat ilinniarfigisariaqaraat.

- Inuiaqatigiittut akissaqanngilluinnarpugut suliffiit akileraarutinillu isertitassat nunatsinniit avammut nassiussornissaannut. Taamaattumik ersarissumik kaammattuutigerusupparput Namminersorlutik Oqartussat Narsamiit sanaartornermut suliamit ilikkagaqarnissaannik, ataatsimiititaliap siulittaasua Kalistat Lund naggasiivoq.

Powered by Labrador CMS