Small Time Giants perngaamik nunatsinni tusarnaartitsissapput
Tallimanngorneq septembarip 30-at Inuuteq Storch aamma nipilersoqatigiit Small Time Giants, Sisimiuni Taseralik sassarfigissavaat
Inuuteq Storch, Københavnimi assiliinermik ilinniarfik tusaamasaq ukioq ataaseq ilinniarfigissallugu aallartippoq.
Sisimiuni HTX-imik ilinniarnerata nalaani assiliinermik soqutigisaqarnera nunaqqataasunut malunniuteqarpoq, namminerlu oqarneratut assi soqutigiuaannarsimallugu. Angutaa Jan Storch inuusuttuulluni sunngiffimmini assiliisartumit assiliinermik soqutiginninnera aallaaveqarpoq.
2009-mi Inuuteq assilisaminik saqqummersitserngaarpoq eqqumiitsuliortutullu piginnaaneq takutillugu. Assilisai teknikkikkut pigisinnaaneqarnermik takutitsiinnaratik, assileeriaat aamma kusanartulerinermik immikkuullarissumik peqarput. Ilinniarnerup nalaani Inuuneq suliakkinneqartarpoq kusanarnerpaamik inaakkaminik, ilinniartitsisuilu oqarput ukiumi tassani ilinniartut akornanni angusat pitsaanerpaat akornanni angusaqartoq, Arnajaraq Støvlbæk oqarpoq.
Ukioq manna Inuutip saqqummersitsinisaa siornali pilersaarusiorneqalerpoq.
- Aallaqqaamut Taseralimmit neriuutigineqarpoq Inuuteq saqqummersitseqqissasoq. Eqqumiitsuliortup inuusuttup inuusuttup ineriartornera malinnaaffigalugu nuannersorujussuuvoq - assileeriaasia erseqqinnerulerpoq eqqumiitsuliortutullu ersarinnermik takutitsilluni. Inuutip silarsuaa eqqumiikajaaq, quiassuarnera inuunermullu qaamasumik isiginnittaaseqarnera assilisaani takuneqarsinnaajuaannarpoq, Arnajaraq Støvlbæk allappoq.
- Inuutip siunnersuutigaa, saqqummersitsinermik ammaanersiornissamut Small Time Giants nipilersortuussasut. Danmarkimi tusarnaartitsimmata nipilersoriaasiat nuannarilersimagamiuk, taakkualu aasap ingerlanerani nunatsinni tusagassiivinni arlaleriarlugit tusartarpagut. Allakkajaamik soqutiginartumillu nipilersoriaaseqarput, Taseralimmiillu nipilersukkat nalinginnaanngitsut aamma nutaat tusarnaartitsissutigineqartarnissaat anguniagaammat tulluartorujussuullutik, timersortarfissuarni tusarnaartitsinernit aallaanerusut. Nipilersoqatigiit tikilerput Kalaallit Nunaanni perngaamik tusarnaartitsissallutik, Arnajaraq Støvlbæk oqarpoq.
Tikisinnerat ukunannga aningaasalerneqarpoq: Air Greenland, Kulturfonden Danmark-Grønland, Royal Arctic Line, Elektrikerit ApS kiisalu Taseralik.