Qineqqusaartut arlaqartut qinngasaarisarneq naaggaarpaat
Nuummi Qinngutsinni Atuarfik Hans Lyngemi ilinniartut siunnersuisoqatigiivinut niviarsiaqqat arfineq marluk nukappiararlu ataaseq qinigassanngortippoq
Ullumikkut Hans Lyngep Atuarfiani atuarfiup siulersuisuinut atuartullu siunnersuisoqatigiivinut qinersisoqassaaq.
- Qinersinivittut aaqqissuussimavarput, taamaalillutik atuartut karsinut qinersivissanut nakkartitsillutik taasillutik, ilinniartitsisut Mette Labansen aamma Melissa Hansen allapput.
- Kommuneqarfik Sermersuumit karsit nakkartitsivissat qinersivissallu attartorsimavagut, oqarput.
Taagorneqarnerpaaq atuartunut siulittaasunngussaaq. Taamaalilluni præsidentimik qinersinerut illuni.
Ippassaq qineqqusaartut qineqqusaartinneqarput, qinersinerlu ullumi nal. 10.15-miit 11.00-mut ingerlanneqassaaq.
Ilinniartitsisut qinersinerup nalaani nakkutilliisuupput. QInersinerup kinguninngua taasinerit kisinneqarput, Mette Labansen aamma Melissa Hansen nalunaarput.
Qineqqusaartut arfineq pingasut tassaapput Rosalia Stenbakken, Nivi J. Petersen, Rumle Labansen, Mia Drechsel, Trina Skifte, Ivaana Geisler, Nalini Mortensen aamma Aviaq Joelsen-Albrechtsen.
Tamarmik atuarfimminnut pitsaasunik iliuuseqarniarlutik qineqqusaarnerminni oqarput.
Assersuutigalugu Nalini Mortensen oqarpoq atuartunut siulittaasoq tusaaniallaqqissuussasoq, oqaloqateqallaqqilluni, ikiuiumatuujulluni sapiitsuullunilu.
- Atuarfik pitsanngorsaaqataaffigerusuppara. Ilissi pillusi ilungersuuteqartarniarpunga, oqarpoq.
Nivi J. Petersenip atuartoqatini ajornartorsiortut ikiortarumavai atuarfilli pitsaasuutikkusullugu.
Rosalia Stenbakkenen oqarpoq atuarfik nutaaq tamanut nutaamik aallartiffiusoq, atuarfik tamatta pigaarput ilinniartitsisuinnaanngitsut, taamaattumik sulissutigerusuppara atuarfiup maleruagassaasa suliarineranni meeqqat aalajangeeqataanissaat.
- Isumaqarpunga atuarfik qinngasaariffiussanngitsoq, Rosalia Stenbakken oqarpoq.
Aamma Rumle Labansenip qinngasaarisarneq unitsikkusuppaa. - Pisinnaatitaaffitit sulissutigerusuppakka, qinersisartunut oqarpoq.
Mia Drechselip aamma qinngasaarinerup unitsinneqarnissaa sulissutigerusuppaa. - Arlaanik ajortumik pisoqassappat sullikkusuppassi, oqarpoq.
Soqutiginarpoq niviarsiaqqat amerlanerit qineqqusaarmata. Tassalu arfineq marluullutik nukappiararlu ataasiulluni.