Akisussaaffeqartumik
Niels Thomsen naalakkersuisut akisussaanerannut tunngasumik inatsisissatut siunnersuuteqarsimavoq
Inatsisartut ataatsimiinneranni akisussaaffiit agguarnerat aalajangersagaasarpoq: Naalakkersuisut inatsisissatut siunnersuuteqartarput Inatsisartunullu ilaasortat aalajangiivigisassasut siunnersuuteqartarlutik apeqqarissaarnermilu apeqquteqartarlutik. Aamma ukiaanerani ataatsimiinnermi taapmaappoq, ilaasortat 66-nik siunnersuuteqarlutik naalakkersuisullu 24-nik nutaanik oqaluuserisassaateqarlutik.
Taamaannerpami. Ilaasortat inatsisissatut siunnersuuteqartarnerat qaqutigoortuuvoq, ukiaaneranili ataatsimiinnermi siunnersuutit taamaattut marluupput, tamarmik Niels Thomsenimit Demokraatineersumit.
– Naalakkersuisut akisussaanerat pillugu Inatsisartut inatsisaani qulakkeerneqarpoq maani nunatsinni pissaanermik tigumiartut tassalu naalakkersuisut sulinerminnut tunngatillugu akisussaatinneqarsinnaallutik, taamaattumillu nunatsinni tamat oqartussaaqataannerannut tunngaviulluni, Niels Thomsen oqarpoq.
Inatsisit arlaleriarlutik allanngortinneqarsimanerat peqqutigalugu naalakkersuisut akisussaanerat pillugi inatsit arlalitsigut pisoqalisoorsimavoq, tamannalu ukiuni arlalinni taamaassimavoq.
Niels Thomsenilli naalakkersuisut iliuuseqarnissaat utaqqerusussimanngilaa, namminerli inatsisissatut siunnersuuteqarluni, taamaalilluni inatsit namminersorlutik oqartussaqalernerata nunatsinnilu nutaamik pinerluttulerinerik inatsiseqalernerata kingorna nutarterneqarluni.
– Uagut Inatsisartunut ilaasortaasut tamatigut naalakkersuinikkut isummat kissaatillu naalakkersuisunit piviusunngortinneqarnissaat utaqqiinarsinnaanngilarput. Naalakkersuisut suliassaqarluareerput, ajunngilarlu uagut nammineerluta siunnersuutit naammassisinnaagutsigik, Niels Thomsen oqarpoq.