Partiit naatsorsuutaat tamanut saqqummiuttarlugit
Niels Thomsenip piumasaraa ingerlatsivinnit soqutigisaqaqatigiinnillu aningaasatigut tunissutit ammasuussasut
Danmarkimi selskabit soqutigisaqaqatigiiffiillu namminersortut politikkikkut partiinut aningaasanik tunissutigisartagaannik oqallinneq sakkortuseqqippoq folketingimut qinersinermut atatillugu, maannalu Niels Thomsenip Demokraatineersup nunatsinni partiit naatorsuutaat takusalerusuppai, takuniarlugu kikkut partii suna tapersersortarneraat.
Niels Thomsen nammineq partiit naatsorsuutaasa tamanut saqqummiuttarnissaannik inatsisissatut siunnersuusiorsimavoq, taannalu sisamanngorpta inatsisartuni saqqummiutissavaa. Qaqutigoortorujussuuvoq Inatsisartunut ilaasortaannaat inatsisissatut siunnersuummik toqqaannartumik inatsisartuni saqqummiussisarnerat, Niels Thomsenili nammineq aqqutissarsiorpoq qulakkeerniarlugu innuttaasut takusinnaassagaat partiit politikkikkut ingerlatsinerat kikkut aningaasalersortaraat.
- Partiit isertitaasa ilarparujussui tassaapput landskarsimit tapiissutit, tassa qinersisartunit, aammattaarli ingerlatsiviit soqutigisaqaqatigiiffiillu partiimut tunissuteqarsinnaapput, Niels Thomsen oqarpoq.
- Taamaasiorsinnaapput pingaartitaannaviit tunngavigalugit, tassa partiip taassuma suliai tapersersorusullugit, aammattaarli imaassinnaavoq ingerlatsiviit soqutigisaqaqatigiiffiillu tapiissuteqartut sunniuteqarusullutik iluaqutissarserusullutillu.
- Tamanna pinngitsoortinneqarsinnaanavianngilaq, qulakkeerneqarsinnaavorli tamanna ammalluinnartumik pissasoq, qinersisartut naliliisinnaatillugit partii "pisiarineqarsimanersoq", tapiissuteqartup kissaatai malillugit politikkiminik aaqqissuussilluni, Niels Thomsen oqarpoq.
- Partii sunaluunniit naggataatigut qinersisartunit nalilerneqartussaavoq. Taamaattumik qinersisartut nalilersinnaassavaat partiip aningaasanik tapiissutilik assuarnartumik iluaqutissarsiniarsimaneraa, tamannali taamaallaat pisinnaavoq qinersisartut ilisimagunikku partiit politikkikkut suliaannut kikkut aningaasaliissuteqarnersut.
Niels Thomsen naliliivoq partiit naatsorsuutaasa ammasuunissaannik inatsisissatut siunnersuutip akuerineqarnissaa periarfissarissaartoq: - Tamarmik isumaqatigaat politikerit inuttut aningaasatigut soqutigisaat ammasuusariaqartut, ammassunissamilli pisariaqartitsineq minnerulinngilaq partiit soqutigisaat eqqarsaatigalugu. Pingaartumik piffissami, nunat tamalaat selskabii aningaasaatilissuit nunami maani ingerlatsinialerfianni.