Nunatta eqqaani suli uuliamik nassaartoqanngilaq
Qeqertarsuup avataani qilleriviit marluk Cairnip qimappai Nuullu avataani qillerivissamut Atammimmut qillerissutit marluk nassarlugit ingerlaarlutik
Cairn Energy nunatta avataani suliaminnik ippassaq nassuaateqarpoq, tamannalu Londonimi pappilissat nalillit allattorsimaffiani Cairnimik piginneqataassutit nalikillilaarnerannik kinguneqarpoq.
Cairnip qillerissutai marluk Qeqertarsuup avataani qillerisimasut maannakkut Nuup avataanut qillerivimmut Atammimmut ingerlaarput.
Cairnip Delta-1-mi qillerivik Napariaq Qeqertarsuup avataaniittoq qimappaa. Delta-1-mi misissuilluni qillerineq qillerivik Leiv Eiriksson atorlugu ingerlanneqarpoq Aasiaat avataani 365 kilometerit missaani avasitsigisumi, tassanilu 2.977 meterinik itissusilimmi qillerisoqarluni kulbrintinik nassaarfiunngitsumik, taamaattumillu tamakkiisumik matuneqarluni, Cairn Energy nalunaarpoq.
Ukioq manna siusinnerusukkut suliffeqarfiup Nuup avataani misissuillutik qillerinertik qimappaat avannaani misissuinertik aallunniarlugu.
Maannakkut Leiv Eiriksson AT2-1-mut Atammimmi Ungavani Nuummiit 198 kilometerinik avasitsigisumut uterpoq itissusilimmi pilersaarutaasumi qillerniarluni. Tassalu 909 meterinik ititigisumi.
Cairn Energymiit aamma nalunaarutigineqarpoq umiarsuaq qillerissut Ocean Rig Corcovado Eqquaniit kujammut 597 kilometerinik Atammiup eqqaanut nuunneqassasoq, tassanilu qillerivimmi AT2-1-mi qillerilerluni, taannalu aamma Nuup avataani 198 kilometerit missaani avisitsigisumiittumi 1.045 meterinik ititigisumi qillerissaaq. Tassalu 2011-mi qillerinerit tallimassaat.
Cairn Energy annertunerusumik paasissutissiiniarpoq Atammiup eqqaani qillerivissaq anguneqarpat.
Bloomberg.com naapertorlugu taama nalunaarnerup kinguneraa Cairn Energy Inc-mi piginneqataassutip ippassaq Londonimi 6,5 procentimik nalikilleriarneranik, suliffeqarfiup killiffimminnik nalunaareernerata kingunerisaanik. Aggustimiit Cairnimik piginneqataassutit 24 procentimik nalikillisimasut Bloomberg.com allappoq.
Google Finance sukumiinerusumik atuarsinnaavat uani: http://www.google.com/finance?q=CAIRN+ENERGY+PLC
Aviisini naqitani kiisalu GREENLAND Oil & mineralsimi pisut malinnaavigaavut www.sermitsiaq.ag/oil-and-minerals -imi.