Nunatsinni ilagiit nunatsinnut atuupput
Nunatta ombudsmandiata nunatta biskoppia ilalerpaa oqarmat nunatsinni ilagiit kalaallit Danmarkimiittut sullitassarinngikkai
Kalaallit Nunaanni ilagiit taamaallaat killilimmik Danmarkimi innuttaasut sullissinnaavai. Taamatut aalajangersaavoq ombudsmandi, nunatsinni ilagiit Danmarkimi pisinnaatitaaffiinik aalajangiinermini.
Suliassaq ombudsmandimut pivoq, pissutigalugu innuttaasup maalaarutigimmagu Danmarkimi kalaallit palasiata innuttaasut Kalaallit Nunaanneersut, piumassutsiminnik Danmarkimiittut, killiliinnarmik sullissinnaagai.
Ombudsmandip suliassaq misissorpaa inerniliillunilu Kalaallit Nunaanni Ilagiit, Namminersorlutik Oqartussat ataaniilluni qallunaat ialgiit ataaniittup, killiliinnarmik Danmarkimi naalagiartitsisarsinnaasoq.
Taamaattumik pissutissaqarpoq kalaallit Danmarkimi palasiata innuttaasut nunatsinneersut, piumassutsiminnik Danmarkimiittut, sullittarnissaanik biskoppi killilersuutinik arlalinnik aalajangersaammat.
Ombudsmandi isumaqarpoq - maalaarummut attuumassuteqanngitsumik - qularnartoqartoq Naalakkersuisut qanoq annertutigisumik Kalaallit Nunaanni Ilagiinnut aqutsisinnaassuseqarnersut.