Nunaminertanik agguaassineq nittartakkakkut
Qaasuitsup Kommunia Sullissineq nutaaq atorlugu Qaasuitsup Kommuniani nunaminertanik agguaassinerni suut akuerineqarnersut malinnaavigineqarsinnaalerpoq
Qaasuitsup Kommuniata nittartagaq atorlugu, kommunemi nunaminertanik atuinissamut tunniussinerit maanna ammanerulernissaat nukittorsarpaa, taama tusagassiivinnut nalunaarut nipeqarpoq.
Nunaminertanik atuinissamut tunniussinerit tamarmik, kommunep nittartagaatigut tamanut siunissami saqqummiunneqartalissapput.
Nunaminertanik atuinissamut tunniussinerit tamanut nalunaarutigisarnissaannut kommune pisussaatitaavoq, maannamulli ajornakusoorpoq, tassa sumiiffinni atuagassiaqarneq ajormat Qaasuitsup Kommunianit tamanit matussusiisumik.
Tamat oqartussaanerisa aqutsinerat
Nittartakkatigut atortoq nutaaq , teknikkikkut nutaaliornerinnaanngilaq. Nunaminertanik atuinissamut tunniussinerit aqunneqarneri ammasumillu pissusilersorfigineqarneri taavalu nunamik atuinissamut pisinnaatitaaffeqarneri pingaartuupput. Taamaattumik kommunep neriuutigaa, taamatut nutaamik suliniuteqarnikkut ersarinnerusunngorumaartoq.
Suut akuersissutaasarnersut, innuttaasunit, tusagassiortunit allanillu soqutiginnittunit malinnaavigineqarsinnaapput.
Asiaq suleqatigalugu, pisortatigoortumik nalunaarsuiffik NIN nutarterneqartassaaq, taannaavorlu nunarput tamakkerlugu nunaminertanik takusiffiusinnaasoq, taamaasinikkut kommunemit aaqqiissut nutaaq aallartinneqarluni.
Nalunaarsuiffik NIN paasissutissanik tunniussinikkut aaqqissutissiisartoq, nunarput tamakkerlugu nunaminertanut tunngasutigut paasisaqarfigisaqarnissamut innuttaasut periarfissippai. Taamatut paasisaqartarnikkut, nunaminertanik pisinnaatitaaffeqarnermut misissuinissamut periarfissiivoq. Nalunaarsuineq akeqanngilaq, kikkunnillu tamanit atorneqarsinnaalluni. ”Asiaq NunaGIS aqqutigalugu sullissisuuvoq, nunatsinni nunaminertanik atuinissamut tunniussinermi nittartakkatigut kommunet nunat assinganik paasissutissanillu takutitsisartoq. NunaGIS-imi kommunet qitiusumik paasissutissiisarfimmut nalunaartarput. Maannakkulli kommunep paasissutissaatai – taamaasillunilu aamma innuttaasut – kommunep nittartagaanut utertinneqartannissaat iluaqutaalissaaq, sumiiffimmi innuttaasumut qaninnerpaajulluni”, taama oqarpoq Karl Brix Zinglersen, Asiami Geodata taavalu NunaGIS pillugit suliniummik ingerlatsisoq.
Teknikki ajornaatsoq
Kommune tamakkerlugu qaammatini kingulliusuni nunaminertanik atuinissamut tunniussat, taamatut aaqqiissuteqarnermi namminerisamik nutarterneqartassapput, tamaanngaanniillu nalunaarsuummut NIN-imut ingerlaqqinnissaq annertunerusumillu ujaasisinnaaneq periarfissaalluni, tassa innuttaasup pisariaqartissappagu.
Piffissap ingerlanerani aaqqiissutaasoq ineriartortinneqassaaq, taamaasilluni kommunep nittartagaani nalunaarsuinerit pitsanngorsakkat aamma saqqumilernerussammata.
Asiap taavalu kommunet nittartakkat atortussaannik pisiniartarfiat DIS-play suleqatigineri, Qaasuitsup Kommunianiit naammagisimaarneqaqaaq, taakkuuppullu innuttaasunik pitsassuarmik periarfissiisut.