Kalaallit Nunaata erfalasua Hamburgimi takornariartaassuit ussatsitsineranni
Kalaallit umiarsuarnik takornariartaatinik suliallit arfineq-marluk ulluni makkunani Kalaallit Nunaannut takornariartitsiniarlutik ulappuseruttorput.
Seatrade Europe Hamburgimi pisoq, Europami umiarsuit takornariartaassuit ussassaarutigineqartarnerisa annersaraat, aaqqissuussisartut nunanit tamalaaneersut hornorujulippassuarnit peqataaffigisagaat.
Umiarsuaq takornariartaat angisooq Kalaallit Nunaannut tikittoq millioninik arlalinnik kaaviiaartitsisarpoq. Taamaattumik sapaatip akunnerani uani nunatsinnit takornariartaatinik suliallit arfineq-marluk umiarsuarnik tikisitsiniaallutik, taamalu nunatta isertitassaanik pissarsiniarlutik suliaqarput. Aamma nunanit allanit tikinneqarusuppugut. Taama Kalaallit Nunaanni Takornariaqarnermut Inuussutissarsiornermullu Siunnersuisoqatigiit tusagassiutinut allappoq.
- Umiarsuaatileqatigiiffiit arlallit Europameersut aqqusaareerput. Tamaat isigalugu ukioq manna pitsaasumik angusaqarsimaneq tusarsaavoq, aamma ilaasorisimasatik Kalallit Nunaanni puigunaatsunik misigisaqarsimapput, Nunatsinni Takornariaqarnermut Inuussutissarsiornermullu Siunnersuisoqatigiinni siunnersortaaneq Malik Milfeldt oqaluttuarpoq.
- Amerlanerpaat 2012-mi Kalaallit Nunaannut uteqqinnissartik naatsorsuutigaat, taamalu tusarlerneqarluni soorunami nuanneqaaq, Malik nangippoq.
Umiarsuit Kalaallit Nunaannut aningaasannassutaasarnerat umiarsuinnaat marluk kisitsisitaanni takuneqarsinnaapput.
Emerald Princess takornarianik 3.080-nik ilaasulik Qaqortumeeqammerpoq. Nunatta karsia 1,6 mio. kr.-inik isertitsivoq pax'imik akitsuutaannarmi, taassuma saniatigut takornariat niuerfii millionip affaata missaat naatsorsuutigaat. Illoqarfimmiut tuniniakkaminnik sammisassaqartitsinermikkullu aamma isertitsipput.
Tikeraarnikut alla Costa Nuummut Ilulissanullu tulakkami pax'imut akiliummut 3 million koruunit nakkartippai saniatigullu illoqarfinni atukkat.
Nammineq ussassaarinissaq
Taamaakkaluartoq peqataasut kissaatigaat siunissami avannaani angalaarfiusinnaasut misigisassarsiorfissatullu neqeroorutaasinnaasut isiginiarneqarnerulernissaat. Ussassaarinermi tassani Kalaallit Nunaata Island, Canada aamma Savalimmiut isumaqatigiissuteqarfigai 2012'p naajartornerani Københavnimi Nordatlantens Bryggemi ussassaarisoqassasoq, ornitassat immikkuullarilluinnartut saqqummersikkumallugit.
- Taamaasioreernikuuvugut iluaqqutaavorlu. Taamaaliornikkut takornariataatinik umiarsuaatillit ullut marluk ingerlaneranni ornitassanut allanut, tunngaviatigut aamma attuumassuteqarfigisinnaanngisatsinnit unammillerteqarata soqutiginnilersissinnaavagut, Malik Milfeldt nassuiaavoq.
Umiarsuarsuaq Sisimiunut
Ivik Knudsen-Ostermann, World of Greenland - Arctic Circle (WOGAC), Sisimiut perngaamik ussassaarisuniipooq. Taassuma aappaagu nunarsuarmi tamani tusamasaasoq tyskit umiarsuaat MS Europa, umiarsuaatillit Hapag Lloyd'imit pigineqartoq illoqarfimminnut tikilluaqqussallugu.
- MS Europa taannaavoq umiarsuaq nunarsuarmi takornariartaatit pitsaanerpaatut innersuutini nalilerneqarsimavoq, naqitaq taanna umiarsuit takornariataatit biibiliatut oqaatigineqartarpoq. Taamaattumik nuannaarutigeqaarput umiarsuup taamma pitsaassusillip Sisimiut tikeraarusummagu, Ivik Knudsen-Ostermann oqarpoq.
MS Europa Sisimiunut tikinnissami Nuuk, Paamiut, Ilulissat aamma Qaqortoq tikissavai.
Ussassaarinersuarmi Nunatsinnit peqataapput GTE aamma WOGAC, Tupilak Travel, Royal Arctic Logistics, Destination Avannaa aamma Greenland Sagalands.
Seatrade Europe sisamanngorneq ilanngullugu ingerlanneqarpoq.