Takisuumik nalunneq

Nuummi Naluttartut peqatigiiffiat aamma naluttarfik Malik Danmarki Svøm Langt 2011'mi peqataassapput

Malik siornatigut Takisuumik nalunnermik unammisitsinermut peqataareerpoq. Assi unammersuarnermit siornatigut aaqqissuussamit assilisaavoq. Assi: Jørgen Chemnitz

Nuna tamakkerlugu unammisitsineq Danmark Svøm Langt soqutigineqartaqisoq sapaammi oktobarip aappaani ingerlanneqalerpat, Nuummi Naluttartut Klubbiat aamma naluttarfik Malik peqataassapput, unammiuaarnermi aningaasarpassuit eqqorneqarsinnaapput. Taama naluttartut peqatigiiffiat naluttarfillu tusagassiutinut nalunaaruteqarput.

Danmarkimi nuna tamakkerlugu nalunnermik unammiuaarnerit aammalu peqataaffigineqarsinnaasut annersaraat, tunngaviusumik siunertaralugu inuit amerlanerpaat nalunnermik nuannarisallit illoqarfimminni naluttarfiliarlutik peqataanissaat.

Nuummi naluttartut klubbianit aamma naluttarfik Malimmit neriuutigineqarpoq sapaatiuppat oktobarip aappaani inuit sapinngisamik amerlanerpaat naluttarfimmut Malimmut nal. 06.00 - 12.00 akornani inuit allat nalunnguaqatigalugit nuannisariarnissaat.

Kikkulluunniit tikilluaqqusaapput: inuusuttut utoqqaat, angisuut mikisullu. Piumasaqaataaginnarpoq nalussinnaanissaq. Naluttarfimmut iserneq akeqanngilaq.

Kikkulluunniit takkuttut naluttarfimmullu aqqartut aaqqissuussinermut peqataanertik pillugu diplomisisinneqassapput.

Naluttarfiit 35-it eqqugassanik pilerinartunik pissarsiniarlutik unammiuaaqataassapput.

Nalukkiarfigineqarnerpaat eqqugassaqassapput.

1. Naluttarfiit illoqarfiup inuttussusaa naapertorlugu amerlanerpaanik naluttoqartut aamma eqqugassaqassapput. Tassani inukinnerusut aamma immikkut isiginiarneqassapput.

2. Naluttarfinni nalunaaqquttap akunnerini arfinilinni takinerpaamik naluffiusut aamma eqqugassaqassapput.

Eqqugassat ima agguataarneqarput:

Naluttut amerlanerpaat

1. præmie: 5.000,00 kroner
2. præmie: 3.000,00 kroner
3. præmie: 2.000,00 kroner

Illoqarfiit amerlanerpaanik naluttoqartut
1. præmie: 5.000,00 kroner
2. præmie: 3.000,00 kroner
3. præmie: 2.000,00 kroner

Meterinik amerlanerpaanik naluttut
1. præmie: 5.000,00 kroner
2. præmie: 3.000,00 kroner
3. præmie: 2.000,00 kroner

Dansk Svømmeunionip nittartagaani - www.svoem.dk - unammiuaarnerup ingerlanera malinnaaffigisinnaavat taamaasillutillu aningaasarpassuarnik eqqueqataanerlutit paasiniarsinnaallugu.

Danmark Svøm Langt Dansk Svømmeunion aamma Halinspektørforeningen suleqatigiillutik aaqqissuussaraat naluttartut peqatigiiffii aammalu naluttarfiit peqataaffigisinnaasaat.

Powered by Labrador CMS