Peqquserluuteqanngilagut

Siumut Inuusuttaannut siulittaasoq Kaalinnguaq Siegstad, Tipsimit lottomillu meeqqat inuusuttullu peqatigiiffiinut tapiissutit nakkutigineqarnerinut Demokraatineersup Andreas Uldumip naalakkersuisunut apeqquteqaata, maanna akissuteqarfigaa.

Siulittaasup eqqumiigaa Andreas Uldum toqqannartumik Siumut Inuusuttaannut apeqquteqaateqanngimmat, illuatungaani paragraf 37 atorlugu naalakkersuisunut apeqquteqaammik saqqummiussilluni tamatuma saniatigut Kaalinnguaq Siegstadip Andreas Uldum kajumissaarpaa paasisaqarusukkuni saaffiginneqqullugu.

Kisianni Kaalinnguaq Siegstadip, Andreas Uldumip apeqqutai akinngilai taassumammi apeqqutigaa Siumut Inuusuttai qassinik ilaasortaqarnersut imaluunniit Siumup Inuusuttai Tipsimit lottomillu tapiissutinik qassinik pisimanersut imaluunniit suna tunngavigalugu inuusuttunut suliniaqatigiiffiup taassuma aningaasanik taperneqarsimanera.

Aamma Kaalinnguaq Siegstadip akissuteqarfigineraa kikkut tamarmik eqqumiigisaat, tassalu sooq Sara Olsvig Siumut Inuusuttaannut ilaasortatut allassimanersoq.

Illuatungaani Kaalinnguaq Siegstadip Siumut Inuusuttaanik immikkoortortaq oqaluttuaraa aammalu Andreas Uldumip apeqquteqaatai isornartorsiuisut appisaluullugit.

Kaalinnguaq Siegstad ilaatigut ima allappoq:" Takornartaanngilaq nunatsinni partiit inuusuttunut immikkoortortaqarmata. Immikkoortortat taamaattut nunani allani atorluarneqartarput nunatsinnili taamaanngilaq. Taamaakkaluartoq nuannaarutigalugu oqaatigisinnaavara, Siumut Inuusuttai ukiorpassuarni eqeersimalluni suliniutinillu arlalinnik ingerlatsilluni piusimammat.

Inatsisartunut ilaasortaq Uldum qimmiaqqatut kimmagassaarututut pissusilersorpoq. Taassuma aningaasanik peqquserluuteqarsimanitsinnik oqaaseqaatini unitsittariaqarpai, soorlu uagut inatsisaatsutut pissusilersornitsinnik oqaaseqaatini unitsittariaqarpai. Tamakkumi SIS'ip inatsisaannut naapertuutinngillat partii erseqqissunik tunaartaqarluni sulivoq, soorlu ima nipeqartunik, aningaasanik peqquserluttuliortoqassanngilaq", Kaalinnguaq Siegstad tikkuaavoq.

Siulittaasoq isumaqarpoq Andreas Uldum SIS'imut paasiniaaqqaartariaqarsimagaluarpoq, kikkunnut tamanut siammarterilinnginnermini.

- Demokraatit inuusuttunut immikkoortortaa tusarfiginngisaannarparput, Kaalinnguaq Siegstad oqarpoq isumaqarlunilu Andreas Uldumip tusarniaqqaartariaqarsimagaluaraa Demokraatit inuusuttaasa Tipsimit lottomillu inuusuttut suliniaqatigiiffiinut tapiissutaasartut atornerluttarnerai, Siumup inuusuttunut immikkoortortai saassuteqqaarnagu.

- Tupigusuutigaara Inatsiartunut ilaasortaq Siumut Inuusuttunut immikkoortortaanut paatsoortitsisinnaasumik oqaaseqarsinnaammat.

-Paasissutissanik allanik pisariaqartitsippat saaffiginninnissaa tikilluaqquarput, Kaalinnguaq Siegstad Siumup nuna tamakkerlugu inuusuttunut immikkoortortaanit oqarpoq.