Otto ullumi 75-nik ukioqalerpoq
Otto Steenoldt kalaallinit politikkerinit sivisunerpaamik folketingimi issiavoq, katillugit ukiut 22-t
Septembarip 27-at 1936 piniartoq Filemon taassumalu nulia Abelonie ernertaarput Qeqertarsuatsiaani Aasiaat pigisaanniittumi. Nukappiarannguaq taanna sunaaffa nunatsinni politikkerit nuimanersaasa ilagilerumaagaat.
Otto Steenholdt, Namminersornerullutik Oqartussat silvimik kuultimillu nersornaateqarpoq aamma Dronningimit ridderkors af 1. grad nersornaatilik, ullumi 75-nik ukioqalerpoq. Klarupimi Aalborgip ungasinngisaani ilaqutani, ikinngutini nalunngisanilu peqatigalugit nalliuttorsiorluni.
Otto nunatsinni politikkimik 1971 suliaqalerpoq, taamani Landsrådimut qinigaagami 1979 tikillugu issiaffigisamini. Suliani nangillugit Kalaallit Nunaata Landstingiani 1979-imiit 2002 tikillugu issiavoq, tamatuma saniatigut Folketingimi 1977-imiit 1998-mut issialluni. Otto Atassummik pilersitseqataavoq, partiip siulittaasuatut kiisalu partiip oqaaseqartartuatut aamma inissisimasimavoq, 1999-imi attaviitsunngornissami tungaanut.
Otto aamma Hanne, taakkualu erneri marluk kiisalu ernutaat tallimat, ullumi Klarupimi angerlarsimaffimminni ilasseqatigiisitsipput. Arfininngorpat fiisternissaq ingerlanneqassaaq ilaqutat qatanngutillu Kalaallit Nunaanneersut peqataaffigisassaanni.
Otto Steenholdt toqqaannartumik aperaarput kalaallit folketingimut qinigaannut nutaanut marlunngorpat sulilersussanut siunnersuutissaqarnersoq, taanna akivoq: "Siutisi ammatissigit, inersuarmi tusarnaaritsi, Kalaallit Nunaannut tunngasunik inatsiserpassuaqanngilaq, isornartorsiuisaritsi minnerunngitsumillu Inatsisartut tusaaniarsigit, pissutigalugu Inatsisartunit siunnersuuterpassuit Folketingimi akuerineqarneq ajorput - naatsumik oqaatigalugu Landstingi tassaavoq Folketingip talia tallisaq."