Mutit atuartitsinermi

Niuernermik ilinniarfiit inuussutissarsiortunik suliffeqarfinnillu suleqateqartarnerat ukiorpassuarni ileqquuvoq.

Maanna NI Qaqortup tamanna pimoorunnerullugu ingerlappaa qaammatikkaartumik oqalugiartitsisarnermigut, taamaaliornikkut "pissutsit piviusut" ilinniarfimmi atuartunit naammattoorneqartarniassammat. Qaqortumi Niuernermik ilinniarfik tusagassiivinnut nalunaaruteqarpoq.

Oqalugiartitsisarnerit ersersippaat ilinniakkamik naammassinnissimagaanni atuagarsuutit qanoq atorneqartarnersut ilikkakkallu qanoq iluaqqutaatiginersut. Tamatuma saniatigut ulluinnaat atuarnermik ilinniagassanillu imallit allanik immersorneqartatut, tusagassiivinnut nalunaarummi atuarneqarsinnaavoq.

- Ukioq atuarfiusoq una aallartimmat Klaus Nuka Andreassen Arctic Green Food'imeersoq, COO (aamma HHX'imik ilinniagalik - Qaqortumi 2009); Kenneth Høegh, Cand. agro siornatigullu Nunalerinermik Siunnersuisoqarfimmeersoq oqalugiartippagut, HHX'imi inspektøri Henrik E. Nielsen paasissutissiivoq.

- Maannakkut NI Great Greenland suleqatigalugu Isaksen Design ilisaritissinnaavaa, pissutigalugu Nickie ukiuni kingullerni marlunni Great Greenlandip atisaliaanik ilulersuisarsimasoq atuarfimmi oktobarip arferngani oqalugiartussanngorpoq. Isaksen nunat tamalaat akornanni atiuvoq akuerisaasoq, ilaqutariit suliffeqarfiuteerannguat saqqumilaartorujussuaq, Henrik E. Nielsen oqaluttuarpoq.

- Suliffeqarfiup taassuma aallaqqaamulli kalaallit ilisarnaataannik aammalumi atortussiaanik atorpoq, piffissalli ingerlanerani tuniniaaffiit assigiinngitsut tunaartarisimallugit kulturikkut assigiinngissummik ataqqinninnermik saniatigut. Kingusinnerusukkut inuusunnerusunut naleqqussagaq KALAK saqqummersippaat. Nickiep tamakku tamaasa oqaluttuarissavai atisassiarisallu ilaannik takutitsilluni, Henrik paasissutissiivoq.

Ajornanngippat atisanik nutaalianik takutitsineq iluatsilluartoq takuteqqinneqarumaarpoq, umiarsuaq takornariartaat Emerald Princess sisamanngornermi septembarip 22-anni Qaqortumiimmat takuteqqaarneqartoq.