Tips- aamma lottomeersut peqqusersusaarutaappat
Demokraatinit maanna paaserusunneqalerpoq partiit inuusuttaasa sulianiaqatigiiffiisa tips- aamma lottomit aningaasat pissarsiatik peqqusersusaarutigisarneraat. Taamaattumik naalakkersuisut apeqquteqaateqarfigai qulakkeerlugu oqaatigisinnaaneraat peqquserluttoqartannginnera
Demokraatit sinnerlugit Inatsisartunut ilaasortap Andreas Uldumip paaserusuppaa, aningaasat tips- aamma lottornermit meeqqat inuusuttuaqqallu suliniaqatigiiffiisa pissarsiarisartagaat nakkutigineqarnersut. Taamaattumik naalakkersuisunut arlalinnik apeqquteqaateqarpoq, qulakkeerumallugu aningaasat tips- aamma lottornermit meeqqat inuusuttuaqqallu suliniaqatigiiffiisa pissarsiarisartagaat peqquserluttuliorfigineqartarnersut.
Tamatuma tunuliaqutaraa, KNR naapertorlugu Nuummi Siumup Inuusuttai oqarnikuuvoq, IA'p folketingimut qineqqusaartitaa Sara Olsvig 32'nik ukiulik, SIS'imut suli ilaasortaasoq. KNR naapertorlugu Sara Olsvig'ip tamanna ilumuunnginnerarpaa Siumup Inuusuttaannut ilaasortaasimanngisaannarluni.
Tamatuma nassataanik Andreas Uldum aperaaq, naalakkersuisut sinnerlugit Tips- aamma Lottomit aningaasanik agguaassinermik akisussaasoq Sorlak, qanoq isilluni paasissutissat agguaassinermik tunngaviusut nakkutiginerai. Ilaatigut peqatigiiffinnut ilaasortat allattorsimaffiinik.
Andreas Uldumip siullertut naalakkersuisut apeqquteqaateqarfigai peqatigiiffiit ataasiakkaat ilaasortaat ilanngunneqartarnersut meeqqat inuusuttullu peqatigiiffii tips- aamma lotto aningaasaateqarfiannit aningaasanik pissarsissatillugit.
Taamaattoqarsimappat Andreas Uldumip paaserusuppaa, peqatigiiffiit aningaasanik qinnuteqarnerminni ilaasortamik amerlassusaat eqqortuunersut Sorlammit qanoq nakkutigineqarnersut.
Tamatuma saniatigut paaserusuppaa partiit inuusuttai qanoq amerlatigisut ukiuni kingullerni tallimani tips- aamma lottomit aningaasaateqarfimmit taperneqarsimanersut.
Uiggiullugu Andreas Uldumip paaserusuppaa, partiit inuusuttai qassit ukiuni kingullerni tallimani ilaasortaqassusertik uppernarsartussaasimaneraat.
Andreas Uldumip ilisimasaqarfigerusuppaa, partiit inuusuttaasa katillutit ilaasortaqassusaat, taakku 2010-mi tips- aamma lottomit aningaasaateqarfimmut qinnuteqarnermi tunuliaqutaasimasut, partiit inuusuttaasa aningaasanik pissarsiumallutik qinnuteqaateqarnerminni namminneq kisitsisilersimasaat.
Naggataatigullu Andreas Uldumip paaserusuppaa, naalakkersuisut nalilersimaneraat Sorlak tips- aamma lottomit aningaasaateqarfimmik allaffissornermik aqutsinerata qulakkeersimaneraa aningaasat tunniunneqartartut peqquserluttumik ingerlanneqartannginnerat.