Ataatsimiititat nutaat inissipput

Atassutip teknikkikkut Siumumik suleqateqarnini nangeqqippaa

Inatsisartut suleriaasertik allanngorteriarlugu sisamanngornermi ataatsimiititanut ilaasortassanik qinersipput. Ass.: Leiff Josefsen

Inatsisartuni inatsisiliorniarneq ukiunik arlalinnik sivisussuseqarsinnaavoq, aammali sukkasoorujussuarmik suleriartoqartarpoq.

Pingasunngormat ualikkut Inatsisartut suleriaasaat nutaaq ataatsimiititat ikilillugit nutaamik aaqqissornerisigut, siornatigut tallimanik ilaasortaqarsinnaasut maanna arfineq marlunnik ilaasortaqarsinnaalersillugit pissaaneqarnerulersitat pingasunngormat Inatsisartut siullermeerlugit oqaluuseraat.

Taava sisamanngormat ualikkut Inastsisartut sukkasuumik suleriaaseqarlutik taakkua aappassaannik pingajussaannillu oqaluusereriarlugit, kinguninngua ataatsimiititani, sinniisoqarfinni, siunnersuisooqatigiinni immikkullu suliassaqarfinni ilaasortassat sinniisussaallu qinerpaat.

Suleriaatsit allanngorttinneqarnerisigut, Inatsisartut ataavartunik arfinilinnik ataatsimiititaqalerput (Siulittaasoqarfik, Aningaasaqarnermut ataatsimiititaq, Nunanut allanut Isumannaallisaanermullu ataatsimiititaq, Akileraartarnermut kukkunersiuinermullu ataatsimiititaq, Inatsisit pillugit ataatsimiititaq kiisalu Qinigaasinnaaneq pillugu ataatsimiititaq) sisamanillu maannakkut ingerlasunik ataatsimiititaqalerlutik (Sanaartornermu Avatangiisinullu ataatsimiititaq, Ilaqutariinnut peqqissutsimullu ataatsimiititaq, Pisuussutit pillugit ataatsimiititaq kiisalu Kulturimut, Ilinniartitaanermut, Ilisimatusarnermut kiisalu Ilageeqarnermut ataatsimiititaq).

– Ataatsimiititat ikilinerisigut ilaasortat ataatsimiititanut ikinnerusunut ataatsimiigiartalissapput, ataatsimiikkaangamillu apeqqutit assigiinngiiaartunut tunngasut isummerfigisassallugit, Inatsisartut siulittaasuat, Josef Motzfeldt, Inuit Ataqatigiit, oqarpoq.

Naalakkersuisooqatigiit Inuit Ataqatigiit, Demokraatit aamma Kattusseqatigiit Partiiat teknikkikkut suleqatigiinneritk ingerlatiinnassavaat, Siumut Atassullu teknikkikkut suleqatigeeqqilersut. Ataatsimiititat tallimanik arfineq marlunnilluunniit ilaasortaqassangaluarpata, Atassutip Inatsisartuni ilaasortaatitai, Siverth K. Heilmann aamma Knud Kristiansen, ataatsimiititani ilaasortaatitaqarnissaminnik piumasaqaateqarsinnaanngillat. Taamaammat taakkua Siumukkut ilaasortaaffigisinnaasaannit "atorniartariaqarput".

– Teknikkikkut Siumumik suleqateqarsinnaanerput nuannaarutigaarput, taamaalilluta ilaasortaatitatta politikkikkut suliaqarnerat killilersuiffiginagu, ataatsimiititani pingaarutilinni ilaasortanngortissinnaaleratsigit, Atassutip siulittaasusa Gerhardt Petersen sermitsiaq.ag-mut oqarpoq.


Powered by Labrador CMS