Assammik arsartartoq unamminermi toqusoq
Sapaatiummat ualikkut qallunaat assammik arsartartut alianartumik toqunermik nalaanneqarput
Maribo Hallerne-mi 1. divisionimi unammisut Team Sydhavsøerne aamma Ribe-Esbjerg HH naammassinissaannut minutsit 13-iinnanngortut Ribe-Esbergimi unammisartoq, 23-iinnarnik ukiulik Lars Olsen taartaasartut issiviata eqqannguani ilisimajunnaarluni uppippoq.
Lars Olsen sakkortuumik pakkerneqarnermi kingorna taarserneqarpoq, kingornali unammeqqilerluni. Kinguninngua.i taartaasartut issiviata eqqannguani uppippoq, tassanilu peqqissaasut fysioterapeutillu passuppaat uummataa aallartinniarlugu.
Aamma Nykøbingimi napparsimmavimmut ambulancimik ingerlannerani uummarsarneqaraluarpoq, napparsimmavimmulli apuunnermi kinguninngua toqulluni.
Ribe-Esbjergip Team Sydhavsøerne-llu unamminerisa naammassinissaanut minutsit 13-iinnanngortut Ribe-Esbjerg 21-16-imik siuaqqasoq Lars Olsen uppimmat unammineq unitsinneqarpoq.
Ribe-Esbjerg HH-p 1. divisionimi Ajax Københavnimut unamminissani taamaatiinnarpaa
Alianartumik toqusoqarnera pissutiglaugu Ribe-Esjbergip aamma Ajax Københavnip sapaatiuppat unamminissaraluat taamaatiinnarneqarpoq. Taamatut oqaluttuarpoq Ribe-Esjbergimi sportschef Sune Agerschou, 23-inik ukiullip ippassaq Team Sydhavsøernemut unamminermi toqunerata kingorna.
- Aliasoqaagut pisimasorlu tupassutigeqaarput. Eqqarsaativut soorunami Larsip marluliaqataanut Sørenimut, holdimi aamma unammeqataasartumut ilaqutaanullu ingerlatippavut. Maanna atugaat artornartorujussuuvoq, Sune Agerschou oqarpoq.