Umiarsuit takornariartaatit Knud Rasmussenip ikiorpai
IUmiarsuaq alapernaarsuut Knud Rasmussen ukioq manna Tunumi alapernaarsuivoq ilaatigullu imarsuit takornariartaatit ikiortarsimallugit, taamatut oqaluttuarpoq Kangilinnguani Sakkutooqarfik quppernermini nittartakkami
Umiarsuup alapernaarsuutip Knud Rasmussenip aasaq suliassarisimavaa umiarsuit takornariartaatit, tunup avannaani Nunap allanngutsaaliukkap avataani imaani kangerlunnilu angalasartut amerligaluttuinnartut nakkutiginissaat ilitsersornissaallu, taamatut Kangilinnguani Sakkutooqarfiup quppernerani nittartakkami oqaluttuarpoq navigationsofficer Thomas Holm Norup.
Tamatuma saniatigut Knud Rasmussenip ukiassaq Sirius qimatulivinnut ilioqqaanerani ikiorpaa kiisalu tunup avannaani illuaqqat, qimussimik alapernaarsuisut atortagaasa, aserfallatsaalineranni ikiuussimalluni.
Umiarsuaq Ittoqqortoormiit tankeqarfiani orsussamik pivoq. Illoqarfiup illoqarfinnit allanit allaanerussutigaa talittarfeqannginnami. Tamanna peqatigalugu ibnuttat Ittoqqortoormiini innuttaasunik sullissiuvik aqqutigalugu folketingimut qinersinissamut allakkatigut taasisinnaasimapput.
Tamatuma kingorna Knud Rasmussen Ittoqqortoormiit kitaanni kangerlorujussuarmi angalavoq, siunisami kangerluit tamaasa atulernissaannut aqqutissiuussilluni.
- Misigisaq nalissaqanngilluinnartoq, tamannalu peqatigalugu atlantikup avannaani sakkutuunut misilittakkanik annertuunik pilersitsisoq sumiiffinnik ilisimannilernermik, kisarfissanik ilisimannilernermik aamma angalaffiusinnaasut nutaat allaaserinerannik, Thomas Holm Norup oqaluttuarpoq.
Ullormi qinersiffimmi Knud Rasmussen Ittoqqortoormiit kujataanni kisarsimavoq ullorlu naallugu qinersineq pissangalluni malinnaaffigineqarluni. Qinersinerp kingorna umiarsuaq Reykjavikimut aallarpoq.
Børnehjemmi pulaarpoq
Ulluni marlussunni Reykjavikimeereerluni Knud Rasmussen tunumut uteqqippoq, tamatumuuna Tasiilamut.
Talittarfimmi aterfiorput illoqarfimmi børnehjemmimi najugallit, umiarsuullu tamakkua atisanik atoqqitassanik "nutaanik" nassaappai.
Meeqqat illoqarfimmiullu soqutiginnittut umiarsuarmut takornariartinneqarput tamatumalu kingorna umiarsuup nerisarfiani sodavandinik mamakujuttunillu agguaasoqarpoq. Naggataatigullu atisat tunniunneqarput, inuttallu meeqqat arsamik nutaamik atsiorsimasumik tunivaat, Thomas Holm Norup oqaluttuarpoq.
Tunumeereerluni Knud Rasmussen nunatta kitaanut ingerlaqqippoq.