Tupamik tunisassiortut pujortartarnikuusup eqqartuussassanngortippai
Ukiuni 48-ni Allan Lykke Jensen pujortarujussuareerluni, tupamik tunisassiortut akoorinerat pissutigalugu pujortarunnaarsinnaajunnaarsimanini eqqartuussisutigut uppernarsartiiniarpaa
2001-imi ullut ilaanni Allan Lykke Jensen biilimini issiatilluni tusarpaa, eqqartuussissuserisoq Anker Laden-Andersen pujortartartumik pujortartarnermi kingorna katsorsarneqarsinnaanngitsumik innarluuteqalersimasumik ujarlerpoq. Taamani eqqartuussissuserisoq tupamik tunisassiortut akerleralugit eqqartuussivimmi ingerlatsivoq, Allan Lykke Jensen-illu tusaramiuk saaffigaa.
Taakkua isumaqarput, cigaretsinik tunisassiortartut cigaretsit pinngitsoorsinnaajunnaarnissaat siunertaralugu isertorlutik akuuisartut. Taamatullu iliuuseqarnerup inerteqqutaanera eqqartuussivikkut uppernarsartinniarpaat.
Allan-ip Anker-imut sianerneraniit ukiut qulit qaangiuttullu, eqqartuussineq Daavip Goliat-imut akersuunneranut assersuunneqartoq marlunngorpat aallartinneqassaaq.
Angutikulunnguaq tunisassiorfissuarnut ajugaassaguni 57.000 koruuninik taarsiiffigineqarsinnaavoq. Tassa ukiuni 48-ni pujortaruloorsimanermi kinguneranik aalulersimanini, puallulersimanini kiisalu sukkortunngorsimanini pillugit taarsiiffigineqarnerata nalinga.
Allan Lykke Jensen ajugaassaguni tupamik tunisassiorfiit aappassaannik ajugaaffigissavai. Siullermik taakkua ajugaaffigai, 2005-imi kingullerpaamik pujortarami.