Kalaallit Nunaannut ingerlatsivik ingerlanerliorpoq
Islandimiut ingerlatsiviup nunatsinnut tunngatitap aningaasalersirnissaa ajornakusoortippaat
Islandimi Bolungarvíkimi Kalaallit Nunaannut tunngatitanik ingerlatsiviup aningaalersornissaa ingerlanerliortoq, Islandimi Morgunbladid nittartakkamini allappoq.
Siorna inuit 30-it peqatigiiffik pilersaarusiortussaq pilersinneqarpoq. Ingerlatsivimmik pilersitsinissap siunertaraa Kalaallit Nunaata Islandimiunut ilisaritinnissaa, paasissutissat saqqummersitsinerillu atorlugit, taamaalillunilu nunat marluk akornanni attaveqaatinik pilersitsisoqarluni.
Peqatigiiffiik Bolungarvíkimiittuuvoq, taannalu siorna juunip 21-ani inuiattut ullorsiornitsinni atoqqaartinneqarpoq.
”Kalaallit Nunaannut tunngatitamik ingerlatsiviliornissaq ilassilluarneqarpoq, pilersinnissaanulli ingerlannissaanullu aningaasaliisussanik amigaateqarpugut.
Upernaaq assiliisartumik Ragnar Axelssonimik (RAX) isumaqatigiissuteqaraluarpugut Kalaallit Nunaannit assilisaannik akeqanngitsumik saqqummersitsinissatsinnut. Ajoraluartumilli saqqummersitsinerup piareersarnissaanut aningaasassaqarsimanngilagut”, Jónas Gudmundsson Bolungarvíkimi sysselmandi pilersaarusiornermut ataatsimiititaliamik akisussaasoq aviisimut Bæjarins bestamut oqarpoq.