Pingaartumik nivissat 134 atortarpaat
Meeqqanut inuusuttunullu nuna tamakkerlugu telefoni, kinaassutsimik taasinani sianerfigineqarsinnaasoq 134 atorneqarluarpoq
2010-mut ukiumut naatsorsuinerup takutippaa meeqqat inuusuttullu Meeqqanut Inuusuttunullu telefoni 134 atorluartaraat, taannalu ukiuni marlussunni atorneqarnikinnerulaalersimagaluarluni, saaffiginnittut (40%-imik) siunnersorneqartullu (58%-imik) malunnaatilimmik amerleriarsimapput. Taamatut paasissutissiivoq Paarisa tusagassiorfinnut nalunaarummi.
2010-mi meeqqat inuusuttullu katillugit 278-it ajornartorsiutinik assigiinngitsorpassuarnik saaffiginnissutaannik ataasiakkaarlugit siunnersorneqarsimapput.
Inuusuttut ajornartorsiutaat
Oqaloqatigiinnermi ajornartorsiutit oqaloqatigiissutigineqakulasartut tassaapput kiserliorneq, imminorneq, kingaassiuutitigut atornerlunneqarneq, aanngajaarniutit, nakuusernerit, angutaammik/arnaammik aliasuutit assortuunnerillu. Oqaatsit "kiserliorneq" aamma "angutaammik/arnaammik aliasuutit" 2010-mi nalunaarsuinermi nutaajupput. Taakkua ajornartorsiuterpassuit tamatigut ilagisarsimavaat, maannali nalunaarsuinermi ersarinnerulersinneqarsimapput, qanoq akulikitsigisumik atugaanersut tamannalu eqqarsarnartoqartitsivoq, tusagassiorfinnut nalunaarummi allassimavoq.
Ilisimasanik katersuiffik
Paarisap 134-imut ukiumoortumik nalunaarsuinera pingaarutilimmik ilisimasanik katersuiffiuvoq, ilaatigut saqqumilaalersinneqarluni ajornartorsiut qanoq isilluni tamatigut allanut attuumassuteqartartoq - maani taaneqaannassaaq oqaloqatigiinnerni imminornermik samminnittuni nakuuserneq, kiserliorneq aammalu kinguaassiuutitigut atornerlunneqarsimanermik misigisat aamma taaneqartarsimanerat.
Nivissat amerlanerupput
Siunnersorneqarnissamik periarfissaq suli nivissat atorneruvaat, taakkua saaffiginnittut 2/3-eralugu.
Siunnersortit ilisimannittut isumaginninnermik ilinniagaqarsimasut meeqqanillu oqaloqatiginninnermik misilittagaqarluartutjj ullut tamaasa ukioq naallugu nal. 19 aamma 21 akornanni 134-imut sianertunut akissuteqarnissaminnut piareersimapput.
PAARISA-p ataani Meeqqanut Inuusuttunullu telefoni 134 ukioq manna ukiunik qulinngortorsiorpoq.
Ukiumoortumik nalunaarsukkat ataani atuarneqarsinnaapput.