Aatsitassart pillugit ataatsimeersuarnerit annersaat
Ulluni marlunni ataatsimeersuarneq 270-init nunanit aqqaneq marlunneersunit peqataaffigineqartoq iluatsilluarpoq, borgmester Asii Chemnitz Narup oqarpoq
Aatsitassat pillugit ataatsimeersuarneq, Joining Forces, Kommuneqarfik Sermersuup Aatsitassaqarnermut pisortaqarfik Kalaallit Nunaannilu sulisitsisut peqatigiiffiat peqatigalugit aaqqissuunneqartoq iluatsilluartoq naammasseqqammerpoq.
Inunnik 270-inik nunanit aqqaneq marlunneersunik peqataasoqarluni ulluni marlunni ataatsimeersuarneq iluatsilluarpoq. Suliffeqarfiit, aatsitassarsiorfiutileqatigiit kiisalu Nunnatsinni nunanilu allani suliffeqarfiutillit peqataatitaqartut naammagisimaarinnilluarput, Kommuneqarfik Sermersuumiit tusagassiuutitigut nalunaarummi taamatutallasimavoq. Kommuni Naminersornerullutik Oqartussat Sulisitsisullu peqatigiiffiat peqatilugit ataatsimeersuarnermik aaqqissuisuupput.
- Ukiuni makkunani ineriartorneq maani suliffeqarfiit pissarsiaqaatigilluarsinnaassagaat ilimagilluinnarpara. Maani suliffeqarfiit suliakkiunneqartut naapertorlugit alliartornissaat, kiisalu siunissaq ungasinnerusoq eqqarsaatigalugu, Nunatsinni nunanilu allani aatsotassarsiornermut atatillugu periarfisssanik atorluaanissaat qularinngilara. Tamannali piviusunngortinneqassappat suliffeqarfiit nutaamik eqqarsariaaseqarlutik isumassarsiorsinnaasariaqarput suleqatigiillutillu, borgmester Asii Chemnitz Narup isumalluarpalulluni oqarpoq.
Maani suliffeqarfiit piginnaanngorsarnissaat Kommuneqarfik Sermersuumiit taspersersorneqarpoq.
Inuussutissarsiutinut Ataatsimiititap siulittaasuata Esmar Bergstrøm-ip oqaatigaa, isumaqatigiinniariaatsinik tuluttut ingerlanneqartumik kommuni aaqqissuusseqqammerpoq, soqutigineqarluartumik.
”Piginnaanngorsaanernik pikkorissartitsisarnivut soqutigineqangaarmata nuannaarutigalugu oqaluttuarisinnaavara tuniniaanermik takoqqusaarinermillu tuluttut ingerlanneqartussamik pikkorissaassamaaratta, kiisalu ukiup naannginnerani ISO standard, tassalu International Organisation for Standardization pillugu maleruagassat pillugit pikkorissaanermik ingerlatsis-salluta. Suliffiutilittatta ineriartortinnerat tamatta iluanaarutigissavarput”, Esmar Bergstrøm oqarpoq.
Kommuneqarfik Sermersuup aatsitassarsiornermut tunngatillugu periusissani, ukiup naajar-tornerani politikkikkut aalajangiiffigineqartussaq, ulluni makkunani inaarsaleruttorpaa.